सशस्त्रलाई देखेर गाँजा फालेर फरार

विराटनगर । जेनजी आन्दोलनपछि लागुऔषधका कारोबारी बढेका छन् । 

मंगलबार मोरङको बुढीगंगा गाउँपालिका–१ बाट सशस्त्र प्रहरीले करिव २० किलो गाँजा बरामद गरेको छ ।

बिहान साढे ६ बजे घुम्ती गस्तीमा रहेका सशस्त्र प्रहरी उपरीक्षक राजेश घिमिरे सवार भ्यानलाई देखेर एक ब्यक्ति जेब्रा झोला फालेर फरार भएका थिए । 

सशस्त्र प्रहरीले झोला खोलेर हेर्दा थाक मिलाएर राखिएको गाँजा बरामद गरेको जनाएको छ । 

कारोबारीले मेसिनले थिचेर गाँजाको थाक बनाई पहाडका जिल्लाबाट तराई र भारतमा पठाउने गर्दै आएका छन् ।

३ नम्बर गण हेडक्वाटर मोरङबाट विराटनगरतर्फ जाँदै गरेको भ्यानलाई देखेर टाउकोमा बोकेको जेब्रा झोला खाल्डोमा फाल्दै मानिस भागेका थिए । 

आवश्यक अनुसन्धान र कारवाहीका लागि गाँजा जिल्ला प्रहरी कार्यालय मोरङमा बुझाइएको सशस्त्र प्रहरीले जनाएको छ ।