दमकललाई पानी भर्न सनसारीमाईस्थानमा जडान भएको डिप बोरिङ सञ्चालनमा

विराटनगर । विराटनगर महानगरपालिकाले आगलागीको जोखिम न्यूनिकरणका लागि विराटनगर–१० स्थित सनसारीमाईस्थानमा जडान गरेको डिप बोरिङ सञ्चालनमा आएको छ ।

महानगरले बजार र दक्षिणी क्षेत्रलाई लक्षित गरी फागुन ४ मा त्यहाँ डिप बोरिङ गाडेको थियो । जडान भएको डिप बोडिङबाट पाँच हजार लिटरको ट्यांकी २० मिनेटमा भरिएको थियो भने तीन हजार लिटरको ट्यांकी भर्न १२ मिनेट लागेको थियो ।

मेयर नागेश कोइराला र उपमेयर शिल्पा निराला कार्कीको उपस्थितिमा महानगरपालिकाले शुक्रबार बिहान दुईवटा दमकलबाट पानी भरेर परीक्षण गरेको थियो । 

महानगरले बजार र दक्षिणी क्षेत्रमा आगलागी भएमा सो स्थानबाट दमकलमा पानी भर्ने गरी डिप बोरिङ जडान गरेको मेयर कोइरालाले बताए । यसअघि बजार र महानगरको दक्षिणी क्षेत्रमा आगलागी हुँदा पानी भर्न महानगर कार्यालय परिसर वा पुष्पलाल चोक नै पुग्नुपर्ने बाध्यता थियो । 

नयाँ बोरिङका कारण अब आगलागीजन्य घटनामा दमकललाई पानी भर्न सहज भएको मेयर कोइरालाले बताए । उनले अन्य ठाउँमा पनि डिप बोरिङ जडान गर्ने तयारी भइरहेको जानकारी दिए । 

सुख्खा मौसम सुरु भएसँगै आगलागीको जोखिम बढ्ने गर्दछ । विराटनगर बजार क्षेत्रमा अझ धेरै जोखिम हुने भएकोले दकमललाई पानी भर्ने स्थान अति आवश्यक हुँदै आएको थियो । 

आगलागी नियन्त्रणको पूर्वतयारी स्वरुप महानगरले दमकलमा पानी भर्न सहज होस् भनेर पायक पर्ने स्थानहरूको छनौट गरी डिप बोरिङ जडान गर्ने कार्य अगाडि बढाएको कोइरालाले बताए । 

‘अन्य स्थानमा पनि डिप बोरिङ जडान गर्ने योजना छ’ मेयर कोइरालाले भने, ‘कसरी विराटनगरवासीलाई राहत पुग्छ भनेर हामीले काम गरिरहेका छौं, सनसारीमाईस्थानमा जडान गरिएको डिप बोरिङबाट बजार र आसपासको क्षेत्रमा आगलागी भइहाले तत्कालै नियन्त्रण गर्न सहज हुनेछ ।’ 

उपमेयर शिल्पा निराला कार्कीले पनि बजार क्षेत्रमा आगलागी भइहाले समयमै नियन्त्रण गरी क्षति न्यूनीकरण गर्न मद्दत पुग्ने जानकारी दिइन् । उनले समयमै पानी भरेर दमकल घटनास्थल पुग्न पाएको खण्डमा आगलागीबाट हुने क्षति कम हुने बताइन् । 

पुष्पलालचोकस्थित वारुणयन्त्रको बोरिङबाट ५ हजार लिटरको ट्यांकी भर्न ५ मिनेट र महानगर परिसरको डिप बोरिङबाट २० मिनेट समय लाग्ने गरेको विराटनगर महानगरपालिकाका नगर प्रहरी प्रमुख राजन पौडेलले बताए । 

ठाउँ–ठाउँमा डिप बोरिङ जडान गरी आगलागी नियन्त्रणको पूर्वतयारी गरेर महानगरले निकै नै प्रशंसनीय कार्य गरेको स्थानीयले बताएका छन् । स्थानीय सहदेव यादवले हेर्दा र सुन्दा सामान्य लागेपनि विराटनगरवासीका लागि महानगरले धेरै नै महत्वपूर्ण कार्य भएको बताएका थिए ।