‘झापाली राइडर’ लेखेको बाइक दुर्घटना, सुर्योदयका राइडरको मृत्यु

विराटनगर । झापाली राइडर युट्युब च्यानल लेखिएको बाइक सोमबार विहान करीव ६ बजेतिर उदयपुरको त्रियुगा नगरपालिका–७ होक्सेमा दुर्घटना हुँदा राइडरको मृत्यु भएको छ ।

प्रदेश १–०१ ०१६ प ४७६ नम्बरको उक्त मोटरसाइकल विपरित दिशाबाट आइरहेको स १ ख ८१६ नम्बरको बससँग ठोक्किएर दुर्घटना भएको जनाइएको छ ।

दुर्घटनामा बाइक राइडर इलामको सुर्योदय नगरपालिका–३ का २४ वर्षीय प्रगित राईको मृत्यु भएको जिल्ला प्रहरी कार्यालय उदयपुरका सुचना अधिकारी प्रहरी नायव उपरीक्षक हरिनन्दन चौधरीले जानकारी दिए । 

दुर्घटनास्थलबाट उपचारका लागि जिल्ला अस्पताल उदयपुरमा लगिएका उनको उपचारकै क्रममा मृत्यु भएको जनाइएको छ ।

प्रत्यक्षदर्शीले उक्त बस गलत साइडमा आएर बाइकलाई ठक्कर दिएको बताएका छन् । 

बस उदयपुरको कटारीबाट गाइघाटतर्फ आइरहेको र बाइक राइडर काठमाडौं जाँदै गरेको खुलेको छ । प्रहरीले थप अनुसन्धान अघि बढाएको प्रहरीले जनाएको छ ।