अनुदानमा कृषि सामग्री हस्तान्तरण

विराटनगर । विराटनगर महानगरपालिकाले दलहन बाली पकेट विकास कार्यक्रम अन्तर्गत कृषकहरूलाई ५० प्रतिशत अनुदानमा कृषि सामग्री हस्तान्तरण गरेको छ ।

महानगरले विराटनगर–१९ स्थित बैजनाथपुर कृषि सहकारी संस्थालाई २४ लाख रुपैया बराबरको कृषि सामग्री हस्तारण गरेको हो । जसमा १२ लाख रुपैयाँ महानगर र १२ लाख रुपैयाँ कृषि सहकारीले बेहोरेको छ । 

मंगलबार महानगर परिसरमा आयोजित कार्यक्रममा मेयर नागेश कोइराला, उपमेयर शिल्पा निराला कार्की र प्रमुख प्रशासकीय अधिकृत रामप्रसाद ढुङ्गेलको उपस्थितिमा आर्थिक विकास समितिका संयोजक श्याम घिमिरे, आर्थिक विकास महाशाखाका प्रमुख प्रतीक गड्तौला, कृषि तथा पशुपंक्षी विकास शाखाका संयोजक हिरालाल यादवलगायतले कृषि सामग्री हस्तान्तरण गरेका थिए । 

कृषिलाई आधुनिकीकरण र यान्त्रीकरण गर्ने उद्देश्यले महानगरले १ थान ट्याक्टर, २ थान मिनि टिलर, सिंचाइ मोटर २ हर्षको ५ थान, स्प्रेयर मेसिन ६ थान, समरसिथल पम्प १ थान र रोटाबेटर १ थान हस्तारण गरिएको थियो ।

कृषि सहकारीमा आबद्ध कृषकहरूले उक्त सामग्री उपयोग गर्न पाउनेछन् । 

बैजनाथपुर कृषि सहकारीमार्फत कृषि सामग्री प्रयोग गरी स्थानीय कृषकले आफ्ना उत्पादन वृद्धि गर्ने शाखा प्रमुख यादवको भनाइ छ । महानगर क्षेत्रभित्र १ हजार ३७५ हेक्टर खेतीयोग्य जमिन छ ।