दुर्घटनामा दुईको मृत्यु

विराटनगर । सुनसरी र इलाम जिल्लाको छुट्टाछुट्टै स्थानमा सवारी दुर्घटना हुँदा २ जनाको मृत्यु भएको प्रहरीले जनाएको छ ।

शुक्रबार सुनसरीको इटहरी उप–महानगरपलिका–६ मा प्रदेश नं. १–०२–००१ ख ९२९४ नम्बरको ट्रकले पैदल यात्री षडानन्द नगरपालिका–१४ भोजपुरका ४२ वर्षीय रामचन्द्र श्रेष्ठलाई ठक्कर दिदा उनी घाइते भएका थिए । उनलाई उपचारका लागि घोपा धरान पुर्याउन साथ मृत्यु भएको थियो ।

ठक्कर दिने ट्रक चालक धरान–१३  का ४५ वर्षीय गोबिन्दबहादुर तामाङलाई इलाका प्रहरी कार्यालय इटहरीले नियन्त्रणमा लिएको छ ।

त्यस्तै इलामको माई नगरपालिका–२ मा ना ४८ प ८६३८ नम्बरको मोटरसाइकल पुलमा ठक्कर खाई दुर्घटना हुँदा घाइते भएका मोटरसाइकल चालक माई नगरपालिका–१० का ३२ वर्षीय बिनोद लिम्बू, मोटरसाइकलमा पछाडि सवार १६ वर्षीय रोशन लिम्बू र २६ वर्षीय दिनेश सार्की घाइते भएका थिए ।

घाइतेमध्ये सार्कीको उपचारका क्रममा मृत्यु भएको जिल्ला प्रहरी कार्यालय इलामले जनाएको छ ।