अन्तर वडा कबड्डीको उपाधि वडा नं. १७ लाई

विराटनगर । विराटनगरमा सम्पन्न प्रथम मदन स्मृति अन्तर वडा खुला पुरुष कबड्डी प्रतियोगिताको उपाधि वडा नम्बर १७ ले जितेको छ । सोमबार सम्पन्न भएको फाइनल खेलमा वडा नम्बर १४ लाई पराजित गर्दै वडा नम्बर १७ ले उपाधि उचालेको हो ।

मदन भण्डारी स्पोर्टस् एकेडेमी विराटनगर महानगर कमिटीको आयोजनामा विराटनगर–१८ राजा विराट खेलमैदान झटियाहीमा प्रतियोगिता आयोजना गरिएको थियो । 

सोमबार नै भएको सेमिफाइनल खेलमा वडा नम्बर ३ लाई पराजित गर्दै वडा नम्बर १७ फाइनलमा प्रवेश गरेको थियो । फाइनलमा वडा नम्बर १४ लाई पराजित गर्दै वडा नं. १७ विजेता बनेको हो ।

विजेता वडा नं. १७ ले नगद ३१ हजार रुपैयाँसहित शिल्ड र प्रमाणपत्र प्राप्त गरेका छन् । त्यस्तै उपविजेता वडा नं. १४ ले नगद २१ हजार रुपैयाँ प्राप्त गरेको जनाइएको छ । 

प्रतियोगीताको उत्कृष्ट खेलाडी वडा नम्बर १७ का मोहम्मद सहमद आलम र उदीयमान खेलाडी वडा नम्बर १४ का अनिस यादव घोषित भए ।

विजेता तथा उपविजेता वडाका खेलाडीहरुलाई नेकपा एमालेका पूर्व केन्द्रीय सदस्य विनोद ढकाल, विराटनगर महानगर कमिटीका अध्यक्ष सागर थापा लगायतले पुरस्कार वितरण गरेका हुन् ।

उक्त प्रतियोगितामा विराटनगरका १२ वटा वडाहरुबाट खेलाडी टोलीहरुले प्रतिष्पर्धा गरेका थिए ।