सुन्दरहरैंचामा एक्स्पोको तयारी

सुन्दरहरैंचा । यही माघ ३० गतेदेखि १० दिनसम्म लाग्ने सुन्दरहरैंचा विराट एक्स्पो–४ लाई भव्य रूपमा सम्पन्न गर्न आयोजक सुन्दरहरैंचा उद्योग वाणिज्य संघले विभिन्न क्षेत्रसँग छलफल तथा अन्तरक्रियालाई तीव्रता दिएको छ ।

यसै क्रममा सुन्दरहरैंचा क्षेत्रका क्रियाशील सञ्चारकर्मीसँग छलफल गरिएको छ । आम नागरिकसम्म सूचना पुर्याउन सञ्चार क्षेत्रको भूमिका महत्वपूर्ण हुने भएकाले छलफल गरिएको सूचना, सञ्चार प्रविधि व्यवस्थापन उपसमिति  संयोजक कृष्णप्रसाद ओझाले बताए । 

यसपटकको एक्स्पोमा डिजिटल प्रविधिको उच्चतम प्रयोग गरेर प्रचारप्रसार गर्ने तयारी रहेको समेत ओझाले बताए । नेपाल पत्रकार महासंघ मोरङ जिल्ला कार्यसमिति सदस्य बाबुराम निरौलाले एक्स्पो सफल बनाउने कुरामा सञ्चारकर्मीको सँधै साथ रहने बताए । उनले सञ्चार क्षेत्रलाई दिइने विज्ञापनलाई एकरूपता दिन सुझाव समेत दिए ।

छलफलमा सुन्दरहरैंचा उद्योग वाणिज्य संघका अध्यक्ष नारायण कार्कीले एक्स्पो सफल पार्न आम सञ्चार क्षेत्रसँग सहकार्य गरेर जाने प्रतिबद्धता जनाए । 

यसअघि बैंक तथा वित्तीय क्षेत्र, सहकारी क्षेत्र, निजी विद्यालयका प्रतिनिधिलगायत क्षेत्रसँग छलफल गरिसकिएको उनले बताए । 

सुन्दरहरैंचा–१० विराटचोकमा फागुन ११ गतेसम्म चल्ने एक्स्पोका लागि धमाधम स्टल बुकिङ भइरहेको छ । 

एक्स्पोबाट प्राप्त रकमले निर्माणाधीन सार्वजनिक शौचालय सम्पन्न गर्ने र अरू पनि शौचालय निर्माण गर्ने उद्देश्य राखिएको छ ।