राजवंशी समाजको स्थापना दिवस

विराटनगर । राजवंशी समाज विकास समितिले ३१ औं स्थापना दिवस मनाएको छ । झापामा केन्द्रीय कार्यालय रहेको सो संस्थाले मोरङको सुनवर्षी नगरपालिका–९ स्थित भेरुवा थानमा विविध कार्यक्रम आयोजना गरी स्थापना दिवस मनाएको हो । कोशी प्रदेशका मुख्यमन्त्री हिक्मतकुमार कार्कीको प्रमुख आतिथ्यतामा भएको सो कार्यक्रममा समाजका विविध क्षेत्रमा योगदान दिने पाँच जनालाई सम्मान गरिएको थियो । 

अंग्रेजीमा पिएचडी गर्न सफल एनएल राजवंशी, थाइल्याण्डमा हालै सम्पन्न प्रतियोगितामा मिस हैरिटेज बन्न सफल मनीषा राजवंशी, सञ्चारकर्मीद्वय दीपिका राजवंशी र अनिल राजवंशी सहित भारतका शिक्षासेवी डा दिपक रायलाई सम्मान गरिएको थियो । उनीहरूलाई मुख्यमन्त्री कार्की र संस्थाका अध्यक्ष सुवन्तकुमार राजवंशीले दोसल्ला तथा सम्मानपत्र सहित सम्मान गरेका थिए ।

सो अवसरमा सहभागी स्थानीय कलाकारले कोच राजवंशी समुदायको मौलिक पारम्परिक नृत्यहरू कुसान नाच, ग्वालिनी  नृत्य र हुदुम लगायतका गीत र नृत्य प्रस्तुत गरेका थिए । कार्यक्रममा भारतको आसाम तथा बंगालबाट आएका कलाकार तथा प्रतिनिधिले समेत सहभागिता जनाएका थिए । 

सो अवसरमा बोल्ने राजवंशी अगुवाहरूले राजवंशी संग्रहालय स्थापना गर्नुका साथै राजवंशी भाषा संस्कृतिको विकासमा सरकारले विशेष ध्यान दिनुपर्ने माग गरेका थिए । आदिवासी जनजातिमा सुचीकृत कोच राजवंशी समुदायका महिलाले पोशाकको रुपमा पेटानी र पुरुषले धोती–कुर्ता लगाउँछन् । 

विराटनगर महानगरपालिकामा कोच राजवंशी समुदायको १० हजार र मोरङमा यो समुदायको ९५ हजार जनसंख्या रहेको आयोजक समितिका महासचिव चन्द्रप्रसाद राजवंशीले जानकारी दिए ।