माबोलाई मोसो दल्ने समूहका एक पक्राउ

विराटनगर । आफ्नो पक्षमा नबोलेको आरोपमा ताप्लेजुङका पदम चेन्जी माबोलाई बलपूर्वक मोसो दल्ने आठ जनाको समूहका एकजनालाई प्रहरीले पक्राउ गरेको छ ।

इलाका प्रहरी कार्यालय धरानले मंगलबार विहान धरान–८ भोटेपुलबाट सुमन चेम्जोङ पक्राउ गरेको जनाएको छ ।

ताप्लेजुङको पाथीभरा मन्दिर जाने केबलकार निर्माणको पक्षमा बोलेको आरोपमा चेम्जोङसहितको समुहले माबोलाई धरानमा कालोमासो दलेको थियो । उक्त समूहले बलपूर्वक केबलकार निर्माणको विपक्षमा बोल्न बाध्यसमेत पारेको थियो ।

घटनापछि माबोले सोमबार इलाका प्रहरी कार्यालय धरानमा उजुरी दिंदै आफुलाई कालोमोसो दल्ने समूहलाई पक्राउ गरी कानुनी कारवाहीको माग गरेका थिए । 

माबोलाई धरान–१५ का दिवस राई, अमर इजम, जेन्टल लावती, शिवहाङ राई, सिर्जना बेघा र विष्णु थाम्देन समेतको समूहले मोसो दलेका थिए । 

घटनापछि उनीहरू भागेका थिए । उनीहरू विरूद्ध पक्राउ पूर्जी जारी भएपछि किरात याक्थुङ चुम्लुङ सुनसरीले मंगलबारसम्म हाजिर गराउने प्रतिवद्धता जनाए पनि उनीहरूलाई सम्पर्कमा नल्याएपछि प्रहरीले खोजी गरी पक्राउ गरेको जनाइएको छ ।

आठैजना विरूद्ध आपराधिक उपद्रो सम्बन्धी कसुरमा किटानी जाहेरी दर्ता भएको प्रहरीले जनाएको छ ।

केबलकार निर्माणको विरोध गर्दै आएको ‘नो केबलकार अभियान’ मा रहेका समूहले माबोलाई मोसो दल्दै हातपात समेत गरेको उजुरी प्राप्त भएको इलाका प्रहरी कार्यालय धरानका प्रहरी नायव उपरीक्षक प्रकाश जबेगूले बताए । 

माबोले पाथीभरामा केबलकार बन्दा जिल्लाको विकासमा सहयोग पुग्ने बताउँदै आएका थिए । 

यता केबलकार निर्माणको समर्थनमा मंगलबार ताप्लेजुङको सदरमुकाम फुङलिङ बजारमा र्याली प्रदर्शन भएको जनाइएको छ ।

विकास प्रेमी युवा समाजको नामबाट र्याली निकालिएको जनाइएको छ । उक्त र्यालीमा माबोलगायत केबलकार पक्षधर रहेका व्यक्तिहरू सहभागी भएका छन् । र्यालीलाई फुङलिङ नगरपालिका प्रमुख अमिर मादेनसमेतको समर्थन रहेको जनाइएको छ ।

केबलकार विपक्षमा रहेका व्यक्तिहरूले भने मंगलबार नै पाथीभरासम्म पदयात्रा गरेर क्षमा पूजा गरेको जनाइएको छ ।