‘विराटनगर किङ्ग्स’ को नाम र लोगो सार्वजनिक

विराटनगर । फ्रेन्चाइज क्रिकेटको महत्वपूर्ण उत्सव मानिएको नेपाल प्रिमियर लिग (एनपीएल) क्रिकेटको पहिलो संस्करणमा खेल्ने विराटनगरको टिम ‘विराटनगर किङ्ग्स’ ले आफ्नो नाम र लोगो बुधबार सार्वजनिक गरेको छ । 

नेपाल क्रिकेट संघ (क्यान) आयोजना गर्न लागेको उक्त फ्रेन्चाइज खेल्ने आठवटा टिम मध्ये विराटनगर किङ्ग्सबाट नेपाली राष्ट्रिय टोलीका स्पिनर सन्दीप लामिछाने मार्की खेलाडी हुन् । उनैले विराटनगर किङ्ग्सले कप्तानी पनि गर्दैछन् ।

विराटनगर किङ्ग्सले बुधबार आफ्नो फेसबुक पेजमार्फत नाम र लोगो सार्वजनिक गरेको हो । किङ्ग्सले आफ्नो लागो सार्वजनिक गर्दै ‘नयाँ पहिचान’ को अनावरण गरेको उल्लेख गरेको छ । लोगोमा जीवन्त पहेंलो र खैरो रङ्गमा सजिएको विराटनगर किङ्ग्सको लागो नै आधिकारिक रहने उल्लेख छ । 

‘यो रङहरूले एनपीएलमा प्रतिस्पर्धा गर्दा हाम्रो ऊर्जा र दृढ संकल्पलाई मूर्त रूप दिन्छ’ किङ्ग्सले भनेको छ, ‘हाम्रो लोगो डिजाइन मात्र होइन, यसले पूर्वी नेपालको मुटुलाई प्रतिनिधित्व गर्दछ, एक क्षेत्र यसको समृद्ध प्रवेशद्वार र हिमालयको काखमा रहेको राजसी इतिहासको लागि प्रसिद्ध छ ।’ 

एनपीएल आगामी मंसिर १५ देखि पुस ६ सम्म काठमाडौंमा हुने भनिएको छ ।