सरस्वती र सत्यनारायण स्कुल विजयी

विराटनगर । नेपाल क्रिकेट फाउण्डेशन र मोरङ जिल्ला क्रिकेट संघको आयोजनामा विराटनगरको वैजनाथपुर क्रिकेट मैदानमा भइरहेको अन्तर–स्कुल क्रिकेट प्रतियोगितामा सरस्वती मावि र सत्यनारायण मावी विजयी भएका छन् ।  

आइतबार भएको पहिलो खेलमा सरस्वती माविले मदरल्याण्ड एकेडेमीलाई ४८ रनले पराजित गरेको छ । टस जितेर ब्याटिङ गरेको सरस्वतीले १७ ओभरमा ८ विकेट गुमाई ८३ रनबनाएको थियो । जसमा अभिषेक यादवले सर्वाधिक २५ रन बनाए । मदरल्याण्डका वीरजल राजवंशीले ४ विकेट लिदा खेमराज हमालले ३ विकेट लिए ।

८४ रनको लक्ष्य पाएको मदरल्याण्डले १२ दशमलव ३ बलमा सवै विकेट गुमाई  ३५ रनमा सीमित भयो । मदरल्याण्डका कुनै पनि खेलाडीले दोहोरो अंक छुन सकेनन् । सरस्वतीका उत्कृष्ट खेलाडी अभिषेछक यादवले ४ विकेट लिए ।

दोस्रो खेलमा सत्यनारायण स्कुलले महेन्द्र स्कुललाई ८२ रनको फराकिलो अन्तरले पराजित गरेको छ । टस जितेर ब्याटिङ गरेको सत्यनारायणले निर्धारित २० ओभरमा ६  विकेट गुमाई १ सय ५५ रनको योगफल तयार पारेको थियो । जसमा सलमान कामतले सर्वाधिक ४९ रनको योगदान दिए । महेन्द्रका शिवम् झाले ४ विकेट लिए ।

१ सय ५६  रनको विजयी लक्ष्य पाएको महेन्द्रले १७ ओभरमा सवै विकेट गुमाई ७३ रनमा सीमित भयो । जसमा शिवम झाले सर्वाधिक २९ रन बनाए । सत्यनारायणका उत्कृष्ट खेलाडी सलमान कामतले ४ विकेट लिए ।