जाहेरी बिनै प्रहरीले सूक्ष्म अनुसन्धान गर्दै

विराटनगर । उदयपुरको कटारी नगरपालिका–१० सोरुङ छविसेमा बिहीबार विहान सार्वजनिक भएको आमा–छोराको हत्याको घटनामा प्रहरीले जाहेरी बिनै अनुसन्धान अघि बढाएको छ ।

घटनामा हत्याकै आशंका गरिएपनि अहिलेसम्म कसैलाई पनि आशंका गर्न नसकिएका कारण प्रहरीले अनुसन्धानलाई भने सूक्ष्म रुपमा अघि बढाएको जनाइएको छ । 

बिहीबार बिहान करिव साढे ६ बजेतिर ४० वर्षीय निर्मला थापा र उनका ६ वर्षीय छोरा आरुस थापाको वडा नम्बर १० कार्यालय नजिकै रहेको पसलमै शव भेटिएको थियो ।

पसलमा सामान किन्न गएका स्थानीयले रगताम्य अवस्थामा शव देखेपछि प्रहरीलाई खबर गरेका थिए । घटना घटेको २४ घण्टासम्म पनि परिवारको तर्फबाट प्रहरीमा जोहरी नपरेको जनाइएको छ । 

मृतकहरूको शवलाई प्रहरीले आवश्यक मुचुल्का गरेर पोष्टमार्टमका लागि कटारी अस्पताल पुर्याएको जिल्ला प्रहरी कार्यालय उदयपुरले जनाएको छ ।

निर्मलाका पति अशोक थापा भने दुई वर्षअघि नै दोस्रो विवाह गरी हाल दिल्लीमा बस्दै आएको जनाइएको छ । श्रीमान् कान्छी ल्याएर हिंडेपछि निर्मलाले छोरासँगै वडा कार्यालय नजिकै खाजा र सानोतिनो किराना पसल सञ्चालन गर्दै आएकी थिइन् । 

तर बिहीबार बिहान उनीहरूको मृत फेला परेका हुन् । छोरा आरुसको शव ओछ्यानमै घोप्टो परेको र रगताम्य अवस्थामा भेटिएको थियो । उनको टाउकामा धारिलो हतियारको चोटपटक समेत रहेको जनाइएको छ ।