एकै ठाउँबाट एक हजार ५ सय ४८ किलो गाँजा बरामद

विराटनगर । मोरङ प्रहरीले अहिलेसम्मकै ठुलो परिमाणमा गाँजा बरामद गरेको छ । गोप्य सूचनाका आधारमा प्रहरीले ४९ वटा बोरामा प्याकिङ गरी गोठमा लुकाइराखेको अवस्थामा शुक्रबार दिउँसो एक हजार ५ सय ४८ किलो गाँजा बरामद गरेको हो ।

मोरङको धनपालथान गाउँपालिका–७ स्थितमा बस्ने राजकुमार सिंहको खेतमा रहेको गोठमा लुकाई छिपाई राखेको अवस्थामा उक्त गाँजा बरामद गरिएको जिल्ला प्रहरी कार्यालय मोरङका प्रहरी उपरिक्षक नवराज कार्कीले बताए ।

गाँजा लुकाएर राखेको सुचना पाएपछि खटिएको प्रहरी टोलीले खानतलासी गर्दा गाँजा फेला पारी बरामद गरिएको उनले जानकारी दिए । प्रहरीले गोठधनी सिंहलाई पक्राउ गरी मोरङ जिल्ला अदालतबाट लागुऔषध मुद्धामा म्याद थप गरेको छ । 

इलाका प्रहरी कार्यालय रंगेलीले थप अनुसन्धान अघि बढाएको जनाइएको छ ।