सुन तस्करी प्रकरण माओवादी नेता कृष्णबहादुर महरा पक्राउ

काठमाडौं । सुन तस्करी प्रकरणमा मुछिएका माओवादी नेता एवम् पूर्वसभामुख कृष्णबहादर महरा आइतबार पक्राउ परेका छन् । उनलाई सीआईबीको टोलीले आइतबार पक्राउ गरेको जनाएको छ ।

१० पुस २०७९ मा फ्लाई दुबईको फ्लाइट नम्बर एफजेट ०५८७ नम्बरको उडानबाट काठमाडौं आएका चिनियाँ राहदानी बाहक लि हानसोङले ल्याएका दुई वटा सुटकेशभित्र ७३ वटा बट्टामा रहेका ७३० थान भेप भेटिएको थियो ।

उक्त भेपमा भने सुन लुकाएर ल्याइएको थियो । ८ करोड ५५ लाख २८ हजार ३७४ रुपैयाँ बराबरको सुन ल्याइएको थियो ।

उक्त सुन छुटाउन भन्दै महराले भन्सारमा दबाब दिएको अनुसन्धानमा क्रममा खुलेको जनाइएको छ । यो प्रकरणका उनका छोरा राहुल  महरा यसअघि पक्राउ परेर कारागार समेत चलान भएका थिए ।

पक्राउ परेको सुन भन्सारका नायव सुब्बा रेवन्त खड्का समेतको मिलेमतोमा बेचिएको पाइएको थियो ।

महरा संलग्न रहेको उक्त सुन तस्करीको फाइलमा अनुसन्धान अघि बढाउँदै उनीसँग केही दिन अघि बयान लिइएको थियो ।