गाँजासहित १४ भारतीय पक्राउ

सुनसरी । धरान–१३ जिरोप्वाइन्टबाट ठुलो परिमाणमा गाँजासहित १४ जनालाई प्रहरीले पक्राउ गरेको छ । अस्थायी प्रहरी पोष्ट अमरहाट धरानबाट खटिएको प्रहरी टोलीले धनकुटाबाट धरानतर्फ आउँदै गरेका भारतीय नम्बरका दुई वटा बलेरो गाडीलाई रोकेर जाँच गर्ने क्रममा १ सय ४९ केजी गाँजा बरामद भएको हो ।

गाँजा बरामद भएसँगै ओसार पसारमा संलग्न रहेका चालकहरु भारत बिहारका ३१ बर्षीय मनोरञ्जन मुइमार, ३९ बर्षीया गोपी मण्डल र गाडीमा सवार २३ बर्षीय सञ्जयकुमार मण्डल, ३५ बर्षीया रेखा देवी, ३५ बर्षीया रिङ्कीदेवी, ३५ बर्षीया दया मण्डल, ३७ बर्षीय राजेश मण्डल, ४० बर्षीया पुनम देवी र २४ बर्षीया गुडिया देवीलाई समेत पक्राउ गरेको हो ।

पक्राउ गरेसँगै उक्त घटनामा अको भारतीय गाडीका कारचालक भारत बिहारका २३ बर्षीय सन्तोष साह, कारमा सवार २३ बर्षीय अंकितकुमार यादव, राजा जैसवाल, शिवम् सिंह र सत्यम यादवको संलग्नता रहेको पाईएकोले उनीहरुलाई समेत प्रहरीले  नियन्त्रणमा लिएको हो । 

बरामद गरेको लागुऔषध गाँजा, सवारी साधन र पक्राउ परेका उनीहरुको सम्बन्धमा थप अनुसन्धान भैरहेको प्रहरीले जनाएको छ ।