पेस्तोलसहित तीन पक्राउ

लाहान : सशस्त्र प्रहरी बल नेपाल सिराहाबाट खटिएको टोलीले पेस्तोलसहित तीन युवकलाई सोमवार पक्राउ गरेको छ । सशस्त्र प्रहरी बल नेपालको इन्टिलिजेन्स व्यूरोले दिएको सूचनाका आधारमा जाँच गर्ने क्रममा हतियारसहित मानिस पक्राउ परेका हुन् ।

पक्राउ पर्नेहरुमा  सुरुङ्गा नगरपालिका– ५ सप्तरीका ३२ अनिल राम, सोही नगरपालिका– ५ का  ३० वर्षीय जीवानन्द चौधरी र खड्ग नगरपालिका–४ सप्तरीका ३५ वर्षीय सञ्जयप्रसाद चौधरी छन् ।

लहान नगरपालिका –१ सिङराहीमा सशस्त्र प्रहरीको विशेष जाँचका क्रममा स.९प. ४९७१ नम्बरको यमाहा मोटरसाइकलमा सवार तीन जना युवकको साथबाट आधुनिक ९ एमएमको ब्राउनिङ  पेस्तोल एक थान, सोको म्याग्जिन १ थान र राउण्ड दुईथान बरामद गरेको सशस्त्र प्रहरी बल नेपाल सिराहाले जनाएको छ ।

पक्राउ परेका व्यक्तिको साथबाट नगद  १ लाख ८४ हजार २५३, चार थान मोवाइल सेट, ४ लाख ६४ हजार ५ सय मूल्य बराबरको रिचार्ज कार्डसमेत बरामद गरेको सशस्त्र प्रहरीले जनाएको छ ।