सीमापार विद्युत परियोजनामा लिट्मस इन्डस्ट्रिजलाई स्वीकृति

विराटनगर । नेपालको तार, केबल तथा कन्डक्टर उत्पादन गर्ने सबैभन्दा ठूलो उद्योग लिट्मस इन्डस्ट्रिज लिमिटेडले भारतको पावर ग्रिड कर्पोरेशन अफ इन्डिया (पीजीसीआईएल) बाट उच्च क्षमताको विद्युत प्रसारण लाइन आपूर्ति सम्बन्धी महत्वपूर्ण सम्झौता हासिल गरेको छ । पीजीसीआईएल भारतको केन्द्रीय विद्युत प्रसारण निकाय हो । 

जसले देशको अन्तरराज्यीय तथा सीमापार विद्युत प्रसारण सञ्जाल सञ्चालन गर्छ । सो स्वीकृतिसँगै लिट्मस इन्डस्ट्रिज सीमापार विद्युत् प्रसारण परियोजनाका लागि चयन हुने एकमात्र नेपाली उत्पादक बनेको छ ।

सम्झौताअनुसार लिट्मस इन्डस्ट्रिजले ४०० केभीए सीएसआर मूस कन्डक्टर २,७९९ किलोमिटर उत्पादन तथा आपूर्ति गर्नेछ । यी कन्डक्टरहरू नेपालको डिडिङ्ग–ढल्केबर भारतको बथनाहा सीमापार विद्युत प्रसारण लाइन परियोजनामा प्रयोग गरिनेछ । 

उक्त प्रसारण लाइन ९०० मेगावाट क्षमताको अरुण–३ जलविद्युत् आयोजनासँग सम्बन्धित छ । नेपालमै पहिलो पटक ४०० केभीए सीएसआर मूस कन्डक्टर उत्पादन हुन लागेको हो । 

यसले देशको प्रविधिक तथा औद्योगिक क्षमतामा महत्वपूर्ण उपलब्धि हासिल गर्दछ ।

परियोजना स्वीकृत गर्नु अघि पावर ग्रिड कर्पोरेशन अफ इन्डियाले लिट्मस इन्डस्ट्रिजको कारखानाको गहन मूल्याङ्कन गरेको थियो । 

यस क्रममा उत्पादन प्रक्रिया, उत्पादन क्षमता, गुणस्तर नियन्त्रण तथा परीक्षण प्रणाली साथै समग्र कारखाना पूर्वाधारको समीक्षा गरिएको थियो । 

यस गहन मूल्याङ्कनपछि लिट्मस इन्डस्ट्रिजलाई परियोजनाका लागि कन्डक्टर आपूर्ति गर्न योग्य एक मात्र नेपाली उत्पादकका रूपमा स्वीकृति प्रदान गरिएको हो । 

यसरी लिट्मसले अन्तर्राष्ट्रिय प्रतिस्पर्धामा सामेल भएर छनोट हुनु नेपालको लागि गौरवको विषय भएको जनाएको छ । 

ढल्केबर–बथनाहा प्रसारण लाइन नेपालका महत्वपूर्ण ऊर्जा आयोजनामध्ये एक अरुण–३ जलविद्युत आयोजनासँग सम्बन्धित मुख्य सीमापार संयोजन हो । 

९०० मेगावाट क्षमताको यो आयोजनाले नेपालको ऊर्जा सुरक्षालाई सुदृढ बनाउने अपेक्षा गरिएको छ । 

यसले औद्योगिक विकासलाई सहयोग गर्ने र नेपाल–भारतबीचको विद्युत व्यापार विस्तार गर्ने विश्वास गरिएको छ ।

लिट्मस इन्डस्ट्रिजसँग ठूला प्रसारण परियोजनामा काम गरेको प्रमाणित अनुभव छ । यसअघि कम्पनीले हेटौंडा–ढल्केबर–इनरुवा प्रसारण लाइन परियोजनाका लागि नेपाल विद्युत प्राधिकरणलाई ४०० केभीए सीएसआर मूस कन्डक्टर ३,६०० किलोमिटर आपूर्ति गरिसकेको छ । 

यो परियोजना नेपालका अत्यन्तै महत्वपूर्ण आन्तरिक प्रसारण मार्गहरूमध्ये एक हो ।

लिट्मस इन्डस्ट्रिज लिमिटेड रमेश कर्प समूह अन्तर्गतको उद्योग सन् १९७७ देखि चार दशकभन्दा बढी समयदेखि नेपालमा तार, केबल तथा कन्डक्टर उत्पादन गर्दै आएको अग्रणी उद्योग हो ।