पराल बोकेको पिकअपमा आगजनी गर्ने बुद्धशान्तिका 'बुलेट' पक्राउ

विराटनगर । इलामको रोङ गाउँपालिका–४ पुरानो ढाटस्थित मेची राजमार्गमा शनिबार पिकअप गाडीमा भएको आगजनीमा संलग्न आरोपित एक जनालाई प्रहरीले पक्राउ गरेको छ ।

पक्राउ पर्नेमा झापा बुद्धशान्ति गाउँपालिका–४ का ३४ वर्षीय बुलेट भनिने अञ्जेस राई छन् । 

शनिबार झापाबाट पराल बोकेर इलामको हर्कटेतर्फ जाँदै गरेको मे १ ज ११४० नम्बरको पिकअप गाडीमा केही मान्छेले आगजनी गरेका थिए ।

आगजनीबाट सो पिकअप जलेर पूर्णरुपमा नष्ट भएको थियो ।

आगजनी गर्ने मानिसहरुको खोजीमा जिल्ला प्रहरी कार्यालय इलामबाट खटिएको सादा पोसाक प्रहरी टोलीले सोमबार झापाको अर्जुनधारा नगरपालिका–११ बसपार्कबाट उनलाई पक्राउ गरिएको प्रहरीले जनाएको छ ।