अंश विवादमा ६९ वर्षीय देवरद्वारा भाउजूको हत्या

विराटनगर । मोरङको रतुवामाई नगरपालिका–६ मा ६९ वर्षीय टंकबहादुर बस्नेत आफ्नै भाउजूको हत्या आरोपमा पक्राउ परेका छन् । 

बस्नेतले ६० वर्षीया भाउजु टीकामाया कार्की बस्नेतको हत्या गरेको प्रहरीले जनाएको छ ।

मोरङ प्रहरी प्रवक्ता प्रहरी नायव उपरीक्षक कोपिला चुडालका अनुसार शनिबार दिउँसो चार बजेतिर बारीमा घाँस काट्न गएकी टीकामायाको शव फेला परेको थियो । 

अभियुक्त टंकबहादुरका दाजु गणेशबहादुरकी पत्नी टीकामायाको शव बारीमा फेला परेपछि प्रहरीले अस्वाभाविक मृत्यु भएको भन्दै सुक्ष्म अनुसन्धान गरेको थियो ।

‘अस्वाभाविक रूपमा ज्यान गएको देखिएपछि अनुसन्धान गरेका थियौं’  डीएसपी चुडालले भनिन् ‘शवको परीक्षण गर्दा मृतकको टाउँको पछाडि घुच्चुकमा चोट पनि देखिएको छ ।’

टंकबहादुर र उनका दाजु गणेश बहादुरबीच अंश विवाद रहेको र सोही कारण टंकबहादुरले भाउजुको हत्या गरेको हुनसक्ने प्रहरीले जनाएको छ । 

घटनामा संलग्न रहेको आशंकामा प्रहरीले ६९ वर्षीय टंकबहादुरलाई रतुवामाई–६ स्थित आफ्नो घरबाट नियन्त्रणमा लिएको जनाइएको छ ।