विराटनगरको पाँच होटलबाट ६ महिला र ६ पुरुष पक्राउ

विराटनगर । मोरङ प्रहरीले विराटनगरका पाँचवटा होटलहरूमा छापा मारेको छ । ती होटलबाट ६ जना महिला र ६ जना पुरुष तथा होटल सञ्चालकरूलाई समेत नियन्त्रणमा लिएको जनाइएको छ ।

वडा प्रहरी कार्यालय विराटनगरका प्रहरी नायब उपरीक्षक बुद्ध श्रेष्ठको नेतृत्वमा होटलहरूमा पुगेको प्रहरी टोलीले होटलका कोठाबाट मानिसहरूलाई पक्राउ गरेको स्रोतले जनाएको छ ।

प्रहरीले विराटनगरको बसपार्क क्षेत्रका केही होटलहरूमा अनैतिक कार्य हुने गरेको भन्ने सूचनाका आधारमा लामो अनुसन्धान गरेर छापा मारेको जनाइएको छ । पक्राउ परेका महिला पुरुषहरूलाई वडा प्रहरी कार्यालय विराटनगरमा राखिएको जनाइएको छ । प्रहरीले छापा मारेका होटलहरूको नाम समेत गोप्य राखेको छ ।