सहज च्यालेन्ज फण्ड विजेता चार डेरीको उत्पादन प्रदर्शनीपछि मन्त्री हाङ्‌गामले गरे स्वाद परीक्षण

विराटनगर । सहज च्यालेन्ज फण्ड दोस्रो चरणको विजेता डेरीहरूले उत्पादन गरेका दुग्धजन्य उत्पादनको प्रदर्शन तथा उत्पादनको स्वाद परीक्षण गरिएको छ ।

मंगलबार विराटनगरमा आयोजित कार्यक्रममा कोशी प्रदेश सरकारका उद्योग, कृषि तथा सहकारी मन्त्री खगेनसिं हाङ्गामले च्यालेन्ज फण्डको छनौटमा परी सहयोग प्राप्त गरेका डेरी उद्योगहरूलाई व्यवसाय दिगो बनाउन निर्यातमा ध्यान दिन आग्रह गरे । त्यसका लागि प्रदेश सरकारले समेत आवश्यक सहयोग गर्ने उनले बताए ।

दुग्धजन्य वस्तुको उत्पादनलाई भुगोल अनुसारका उत्पादन र प्रवर्द्धन गर्न सकिने किसानले समेत त्यसको लाभ प्राप्त गर्ने मन्त्री हाङ्गामले बताए । 

सरकारले दुग्ध किसानलाई राहत पुग्ने गरी अनुदान दिएर सहज परियोजना र प्रदेश सरकारबीचको सहकार्यलाई अझ अगाडि बढाएको बताए ।

परियोजनाअन्तर्गत सुर्योदय मिल्क एण्ड वेभरेज विराटनगर, आधुनिक डेरी तेह्रथुम, गोरस डेरी सुनसरी र रितिका डेरी झापाले च्यालेन्ज फण्ड प्राप्त गरेका थिए । 

कार्यक्रममा उनीहरूले उत्पादन गरेका दुग्धजन्य वस्तुको बजार प्रवद्र्धन गर्न सहभागीहरूले त्यसको स्वाद परीक्षण समेत गरेका थिए ।

सहज परियोजनाकी टिम लिडर रिमा श्रेष्ठले चुनौतीलाई जितेर डेरीहरूले विभिन्न प्रकारका उत्पादनहरू बजारमा ल्याउन सफल भएको बताइन् । उनले सहजको च्यालेन्ज फण्डबाट डडेरीहरूको क्षमता विकास भई उत्पादन बृद्धिमा सहयोग पुग्ने बताइन् ।

च्यालेन्ज फण्डले आह्वान गरेको प्रस्तावमा सहभागी भएका १४६ वटा डेरी तथा दुग्धजन्य वस्तु उत्पादकहरू मध्येबाट चारवटा डेरी छनौटमा परेको जनाइएको छ ।

कोशी प्रदेश सरकारको उद्योग, कृषि तथा सहकारी मन्त्रालयका सचिव डा. शरणकुमार पाण्डेको अध्यक्षतामा आयोजित कार्यक्रममा नेपाल उद्योग वाणिज्य महासंघ कोशी प्रदेश समितिका अध्यक्ष राजेन्द्र राउत, होटल एशोसिएशनका केन्द्रीय सदस्य राजन श्रेष्ठ, खाद्य प्रविधि तथा गुण नियन्त्रण कार्यालय विराटनगरका प्रमुख विजय खनाल, नेपाल डेरी उद्योग संघका अध्यक्ष राजनकुमार दाहाल, नेपाल डेरी एसोसिएसनका अध्यक्ष प्रल्हाद दाहाल, राष्ट्रिय दुग्ध विकास बोर्डका कार्यकारी निर्देशक डा. राजेन्द्रप्रसाद यादवलगायतले सहज परियोजनामार्फत नेपालका डेरी उद्योगहरूको क्षमता विकासमा ठुलो सहयोग पुगेको बताएका थिए ।