रहेनन् गोविन्द दाहाल

विराटनगर । नेपाल नागरिक उड्डयन प्राधिकरणका पूर्व निर्देशक गोविन्दप्रसाद दाहालको आइतबार निधन भएको छ ।  विराटनगर–३ बुद्ध चोक निवासी ६० बर्षीय दाहाललाई पछिल्लो समय क्यान्सर भएको पुष्टि भएको  थियो । क्यान्सर लागेको पुष्टि हुनासाथ भारतको नयाँ दिल्लीमा उपचार गरी शनिबार साँझ उनलाई विराटनगर ल्याइएको थियो ।

आइतबार विहान पुनः स्वास्थ्य समस्या भएपछि उनलाई नोवेल अस्पताल लगिएको थियो । उपचारका क्रममा आइतबार दिउँसो उनको निधन भएको बताइएको छ  । 

विराटनगर–३ स्थित बुद्धोदय सहकारी संस्थाका पूर्वर् अध्यक्षसमेत रहेका दाहाल  गौतम बुद्ध अन्तर्राष्ट्रिय विमानस्थलको महाप्रबन्धकबाट सेवानिवृत भएपछि सामाजिक क्षेत्रसँगै राजनीतिमा पनि आवद्ध भएका थिए । पछिल्लो समय उनी रास्वपाको अनुशासन आयोगका रहेर काम गरेका थिए । 

नजिकबाट चिन्नेहरुले उनी मिलनसार र सहयोगी स्वभावको भएको बताउँछन् । दाहालको निधनको खबर सुनेपछि विराटनगर–३ निवासी दुर्गा चापागाईंले सबैको लागि असल, कसैप्रति दुष्ट्याइँ र छलकपट नगर्ने, कसैको धनसम्पति प्रति लोभलालच नराख्ने, आफनै पौरखमा रमाउने र रोपेको बिरुवा मलजल गरेर हुर्काउने उनको स्वभाव रहेको उल्लेख गरेकी छन् ।

‘सामुहिक काम सफल बनाउन सधै काँध थापेर हिड्ने तपाईलाई कसरी अन्तिम  श्रद्धाञ्जली भनौं गोविन्द जी,  तपाईको आत्माको चिर शान्तिको कामना’, चापागाईंले फेसबुकमा लेखेकी छन् । 

दाहालकी श्रीमती, एक छोरा र एक छोरी छन् । क्यानडामा रहेका छोरा आएपछि मात्र उनको अन्तिम संस्कार गरिने पारिवारिक स्रोतले जनाएको छ  ।