भिनाजुको हत्या गर्ने सालो पक्राउ

विराटनगर : झापा जिल्लाको बुद्धशान्ती गाउँपालिका–५ का ३५ वर्षीय रोशन अधिकारी आफ्नै भिनाजुको हत्या आरोपमा पक्राउ परेका छन् । ४५ वर्षीय भिनाजु धन बहादुर कटवालको हत्यामा संलग्न रहेका अधिकारीलाई झापा प्रहरीले पक्राउ गरेको जनाएको छ ।

कार्तिक २२ गते राती ११ बजे रोशन र धन बहादुरबीच बिचमा घरायसी बिषयमा वादविवाद हुँदा अधिकारीले कट्वाललाई खुकुरी र बाँसले टाउको र शरीरका बिभिन्न भागमा प्रहार गरेका थिए ।

आक्रमणबाट गम्भिर घाइते भएका कटवाललाई उपचारका लागि प्रादेशिक अस्पताल भद्रपुर लगिएकोमा उनको उपचारका क्रममा बिहीबार दिउँसो मृत्यु भएको जनाइएको छ ।

घटनाबारे जानकारी पाउनासाथ झापाको इलाका प्रहरी कार्यालय बुधबारेबाट खटिएको प्रहरीले घटनास्थलबाट अधिकारीलाई तत्कालै पक्राउ गरेको हो । 

धन बहादुरको मृत्यु भएपछि प्रहरीले घटनाको थप अनुसन्धान गरिरहेको जिल्ला प्रहरी कार्यालय झापाले जनाएको छ ।