एक अर्ब बढी लगानीमा मोरङमा खुल्यो अन्तर्राष्ट्रिय मापदण्डको 'स्लाइन पानी' उद्योग

विराटनगर । मोरङको बुढीगंगा गाउँपालिका–२ मा १ अर्ब रुपैयाँ भन्दाबढी लगानीमा स्थापना गरिएको ‘एलेक्सा लाइफसाइन्सेज’ सलाइन उत्पादन उद्योग सञ्चालनमा आएको छ । 

उद्योगका वरिष्ठ मुटु रोग विशेषज्ञ डा. भगवान कोइरालाले शुक्रबार एक विशेष समारोहबीच औपचारिक उदघाटन गरेका हुन् ।

स्वदेशमै सलाइन उत्पादन गरी स्वास्थ्य क्षेत्रमा आत्मनिर्भरता हासिल गर्ने लक्ष्यसहित स्थापना गरिएको उद्योगले केही समय अघिदेखि नै उत्पादन बजारमा पठाउन थालिसकेको जनाएको छ । 

उद्योगीद्वय दिनेश ठाकुर र रञ्जित भगतले करिब पाँच वर्षको दीर्घ अध्ययन, अनुसन्धान र योजनापछि उद्योग सञ्चालनमा ल्याएका हुन् ।

उद्योगमा जर्मन प्रविधिमा आधारित अत्याधुनिक मेसिन प्रयोग गरी अन्तर्राष्ट्रिय मापदण्डअनुसार सलाइन उत्पादन भइरहेको सञ्चालकहरूले दाबी गरेका छन् ।

उद्घाटन समारोहमा बोल्दै डा. कोइरालाले स्वदेशमै औषधि उत्पादन हुनु देशका लागि गर्वको विषय भएको बताए ।

‘गुणस्तरमा कुनै सम्झौता नगरी उत्पादनलाई निरन्तरता दिनसके यसले स्वास्थ्य क्षेत्र मात्र होइन, समग्र अर्थतन्त्रमा समेत महत्वपूर्ण योगदान पुर्याउनेछ,’ उनले भने ।

उद्योगले पहिलो चरणमा ‘लार्ज भोल्युम प्यारेन्टरल्स’ अन्तर्गत १०० एमएलदेखि ३ हजार एमएलसम्मका सलाइन उत्पादन गरिरहेको छ । 

दोस्रो चरणमा १ देखि २० एमएलसम्मका ‘स्मल भोल्युम प्यारेन्टरल्स’ तथा तेस्रो चरणमा आँखा र कानमा प्रयोग हुने औषधि उत्पादन गर्ने योजना रहेको निर्देशक दिनेश ठाकुरले जानकारी दिए ।

उनले सहज मूल्यमा गुणस्तरीय औषधि उपलब्ध गराउने र आयातमा निर्भरता घटाउने उद्योगको मुख्य उद्देश्य रहेको बताए । ‘सलाइन उत्पादनको लागत उच्च छ । 

तर, बजार मूल्य समायोजन हुन नसक्दा हाल घाटा सहेरै उत्पादन गरिरहेका छौं,’ उनले भने । 

स्वदेशी उद्योगको संरक्षणका लागि नीतिगत सुधार र सरकारी सहुलियत आवश्यक रहेकोमा उनले जोड दिए ।

हाल उद्योगले १५० जना भन्दाबढीलाई प्रत्यक्ष रोजगारी प्रदान गरिरहेको छ । 

दक्ष जनशक्ति र आधुनिक व्यवस्थापन प्रणालीमार्फत सञ्चालन भइरहेको उद्योगले आगामी दिनमा विदेशी बजारमा समेत औषधि निर्यात गर्ने लक्ष्य राखेको छ ।

नेपालको औषधि बजारमा विदेशी कम्पनीहरूको वर्चस्व कायम रहेका बेला स्वदेशी लगानीमा सञ्चालनमा आएको यस उद्योगले आयात प्रतिस्थापन गर्दै औद्योगिक तथा स्वास्थ्य क्षेत्रमा नयाँ सम्भावना सिर्जना गर्ने अपेक्षा गरिएको छ ।