नुवाकोटमा एयर डाइनेस्टीको हेलिकप्टर दुर्घटना, चार चिनियाँ नागरिक र पाइलटसहित पाँचको मृत्यु

विराटनगर । एयर डाइनेस्टीको कलसाइन ९ एन–एजेडी हेलिकप्टर दुर्घटना हुँदा चार चिनियाँ नागरिकसहित पाँच जनाको मृत्यु भएको छ । 

बुधबार दिउँसो १:५४ बजे भक्तपुरको नलिनचोकबाट रसुवाको स्याँफ्रुबेसीका लागि उडान भरेको हेलिकप्टर तीन मिनेटपछि सम्पर्कबिहीन भएको थियो ।  

उक्त हेलिकप्टर नुवाकोटको शिवपुरी गाउँपालिका–७ सूर्यचौर क्षेत्रमा हेलिकप्टर दुर्घटना भएको नुवाकोटका प्रहरी प्रमुख शान्तिराज कोइरालाले बताए । 

दुर्घटनाको जानकारी प्राप्त हुनासाथ प्रहरी टोली खोजी तथा उद्धारका लागि परिचालन भएको जनाइएको छ । 

हेलिकप्टर पाइलट अरुण मल्लले उडाएको एयर डाइनेस्टीले जनाएको छ । हेलिकप्टर दुर्घटनामा पाइलट मल्लसहित चिनियाँ नागरिकहरु जुदाड टाङ (पुरुष), जिली (पुरुष), जेमिङ सी (पुरुष) र यियाद वु (महिला) को मृत्यु भएको प्रहरीले जनाएको छ ।

उक्त हेलिकप्टरको खोजी तथा उद्धारका लागि काठमाडौँबाट प्रभु एयरको ९ एन–एएनएल हेलिकप्टर पठाइएको नेपाल नागरिक उड्ययन प्राधिकरणले जनाएको छ ।