उद्घाटन हुनुअघि नै मुलगेटमा बसेर ओझाले मागे भोट (फोटो)

विराटनगर । नेकपा एमाले मोरङको अध्यक्ष बन्ने तयारी गरिरहेका राजकुमार ओझा अधिवेशन स्थलको मुलगेटमा शनिबार हात जोडेर यताउता गरिरहेका देखिए ।

अधिवेशन स्थलमा भित्रिंदै गरेका प्रतिनिधि र पार्टी नेता कार्यकर्ताहरूलाई अधिवेशनको औपचारिक उद्घाटन हुनुअघि नै ओझा गेटमा उभिएर स्वागत गर्न भ्याईनभ्याईमा देखिए ।

अध्यक्षको आकांक्षी रहेका ओझाले गेटबाट प्रवेश गरिरहेका धेरैलाई स्वागत गर्न भ्याए । नेतृत्व चयनका लागि आइतबार मात्रै अधिवेशनको बन्द सत्र सुरु गर्ने कार्यतालिका रहेपनि ओझा शनिबार उद्घाटनकै दिन प्रतिनिधिहरू नजिकिने प्रयासमा देखिए ।

उनले विभिन्न पालिकाबाट आएका प्रतिनिधिहरूलाई हात जोडेर नमस्कार गरे, हात मिलाए, स्वागत गरे । उनलाई धेरै शुभकामना पनि दिए । उनले धन्यवाद भने ।

गहिरो चिनजान नभएका पार्टीका नेता कार्यकर्तालाई मुस्कुराउँदै आफ्नो नाम सुनाए । 

केहीसँग एकान्तमा छोटो छोटो कुराकानी पनि गरे । लामो कुराकानी गर्दा उनी गेटबाट प्रवेश गर्ने नयाँ नयाँ प्रतिनिधि फुत्किएलान् भन्ने चिन्तामा देखिन्थे । कसैले एकछिन कुरा छ भन्दै छेउ लगाउन खोज्दा ओझा यतै कुराकानी गरौं भन्दैथिए ।

विराटनगरको बरगाछीस्थित होटल मनास्लु इनको हलभित्र अधिवेशनको उद्घाटन समारोह सुरु हुँदा र आधिउधी नेताहरूले बोल्दा समेत ओझा गेटैमा आफुलाई अध्यक्षको उम्मेदवारका रुपमा उभ्भिएको संकेत गर्न व्यक्त थिए ।

एमाले स्थायी कमिटी सदस्य एवं पार्टी जनसंगठन संयन्त्र प्रमुख भानुभक्त ढकालले शुभकामना मन्तव्य राख्ने बेलामा मात्रै उनी हलभित्र प्रवेश गरेका थिए ।

एमाले मोरङको अध्यक्ष पदका लागि वर्तमान संगठन कमिटीका अध्यक्ष बाबुराम कार्की, जिल्ला समन्वय समन्वय समितिका प्रमुख रहेका एमाले नेता अजम्बर राई र एमाले नेता सागर थापा समेत प्रमुख प्रतिपर्धीका रुपमा चुनावी मैदानमै रहने एमालेका नेता कार्यकर्ताहरूले बताएका छन् ।