सीमा सुरक्षा बैठकका क्रममा ढलेका सशस्त्र प्रहरीका एसपी राजेश घिमिरेको निधन

विराटनगर । सशस्त्र प्रहरी बल ३ नम्बर गण हेडक्वाटर मोरङका प्रहरी उपरीक्षक (एसपी) राजेश घिमिरेको उपचारका क्रममा निधन भएको छ ।

मोरङको विराटचोकस्थित नेपालीरिका होटलमा शुक्रबार आयोजित सीमा सुरक्षा बैठकका क्रममा ढलेका एसपी घिमिरेको उपचारका क्रममा निधन भएको सशस्त्र प्रहरी बल नं. १ बराह वाहिनी पकली सुनसरीका डिआइजी कुमार न्यौपानेले जानकारी दिए । 

एसपी घिमिरे सशस्त्र प्रहरी बल नम्बर १ बराह वाहनी र भारतीय सीमा सुरक्षा बल (एसएसबी) को डिआइजी तहको बैठकमा सहभागी भइरहेको बेला शुक्रबार अपरान्ह अचानक बेहोस भएर ढलेका थिए ।

उनको तत्कालै उपचारका लागि मोरङको विराट मेडिकल कलेज पुर्याएर भेन्टिलेटरमा उपचार भइरहेको थियो । तर उपचारकै क्रममा एसपी घिमिरेको मृत्यु भएको जनाइएको छ ।

उनको शव शनिबार पोष्टमार्टम गरिने जनाइएको छ ।

सशस्त्र प्रहरी बल ३ नम्बर बाहिनी गाडीमाई मकवानपुरमा सरुवा भईसकेका घिमिरे शनिबार नै मोरङ छाडेर नयाँ कार्यक्षेत्रतर्फ जाने तयारीमा थिए । 

घिमिरे विराटनगर महानगरपालिका–३ का बासिन्दा हुन् ।