अत्याधिक मदिरा सेवन गरेका भारतीय नागरिक होटल इस्टर्न स्टारमा मृत फेला

विराटनगर । बेलुका अत्याधिक मदिरा सेवन गरेर सुतेका एक भारतीय युवक विराटनगरस्थित होटल इस्टर्न स्टारमा मृत फेला परेका छन् । भारतको बिहार राज्यस्थित पूर्णिया घर भएका दीपककुमार साह सुतेकै अवस्थामा बिहीबार विहान मृत फेला परेको मोरङ प्रहरीले जनाएको छ ।

साह र उनका अर्का साथी होटलको कोठा नम्बर ३०६ मा सुतेका थिए । होटलका कर्मचारीका अनुसार उनले बेलुका अत्याधिक मदिरा सेवन गरेका थिए । 

भारतीय कपडा कम्पनी सियारामका कर्मचारी प्रतिनिधि रहेका साहलाई रात बोकेर कोठासम्म लैजानु परेको जनाइएको छ ।

कम्पनीका तर्फबाट बुधबार साँझ आयोजित कक्टेल पार्टीमा अत्याधिक मदिरा पिएका साह मृत फेला परेको जनाइएको छ ।

कोठामा सँगै सुतेका उनका साथीले बिहीबार बिहान मृत फेला पारेपछि होटल प्रशासनले प्रहरीलाई खबर गरेको थियो । 

मृतकको शव पोष्टमार्टमका लागि परिवारको प्रतिक्षामा रहेको जनाएको छ । घटनाको अनुसन्धान पनि भइरहेको प्रहरीको भनाई छ ।