सवारी दुर्घटनामा दुई जनाको मृत्यु

विराटनगर । झापा र खोटाङमा भएका छुट्टाछुट्टै सवारी दुर्घटनामा परी दुई जनाको मृत्यु भएको छ ।

मंगलबार साँझ झापाको बिर्तामोड नगरपालिका-३ बिर्ताबजारमा मे. १ च ५९३० नम्बरको गाडीले ठक्कर दिँदा घाईते भएका पैदल यात्री भारत घर भई बिर्तामोड-३ स्थितमा बस्दै आएका ६५ बर्षीय आसारुलाल पानवारीको मृत्यु भएको हो ।

उनको उपचारको क्रममा बिर्तासिटी अस्पताल बिर्तामोडमा मृत्यु भएको प्रहरीले जनाएको छ । 

गाडी चालक कन्काई नगरपालिका-८ का ४६ बर्षीय मान बहादुर भुजेललाई इलाका प्रहरी कार्यालय अनारमनीले नियन्त्रणमा लिएर कानुनी कारवाही अघि बढाएको जनाइएको छ ।

त्यसैगरी खोटाङको दिक्तेल रुपाकोट मझुवागढी नगरपालिका-४ मा ना. १ ज ५७४३ नम्बरको गाडी अनियन्त्रित भई दुर्घटना हुँदा दिपक बस्नेतको ८ बर्षीय छोरा हेमन्त बस्नेतको मृत्यु भएको छ । 

घाइते अवस्थामा उनलाई उपचारका लागि लैजाने क्रममा बाटैमा मृत्यु भएको खोटाङ प्रहरीले जनाएको छ । 

प्रहरीले गाडी चालक गोबिन्द कटुवाललाई नियन्त्रणमा लिएर घटना सम्बन्धमा थप अनुसन्धान अघि बढाएको जनाइएको छ ।