महिना दिनमै सुस्तायो कांग्रेसको 'कचनकवल-सगरमाथा' अभियान

विराटनगर । नेपाली कांग्रेस कोशी प्रदेश समितिले ६ महिनासम्म निरन्तर सञ्चालन गर्ने घोषणा गरेको ‘कचनकवल–सगरमाथा जागरण अभियान’ एक महिनामैसुस्ताएको छ । जागरण अभियान सञ्चालनको लक्ष्य विपरित अभियानलाई एकदिने आमसभामा परिणत गराउन खोजेको भन्दै कांग्रेसभित्रै असन्तोष पनि चुलिएको छ ।

कोशी प्रदेशका ५६ वटै प्रदेश निर्वाचन क्षेत्रका जनता, मतदाता र कार्यकर्तासँग अन्तरक्रिया गर्ने आकर्षक नारा यो अभियानको प्रमुख आकर्षण थियो ।

नेपालकै होचो भूभाग मानिने झापाको कचनकवलमा पुस २४ मा तामझामसहित कार्यक्रमको उद्घाटन हुँदा कांग्रेस नेताहरुले पनि मतदातासम्मै पुगेर पार्टीका नेताहरुले सघन संवाद गर्ने बताएका थिए । 

‘प्रदेशका सबै निर्वाचन क्षेत्रका कार्यकर्ता र जनतासँग प्रत्यक्ष भेटेर अन्तरक्रिया गरिनेछ, त्यसबाट प्राप्त सुझावहरु पार्टीका लागि मार्गदर्शन हुनेछ’, पूर्व मुख्यमन्त्रीसमेत रहेका पार्टी कोशी सभापति उद्धव थापाले त्यसबेला भनेका थिए ‘यो अभियानले पार्टीलाई गतिशील तुल्याउनेछ ।’ 

सभापति थापासहितका नेताहरुले यस्तो विश्वाससहित थालेको प्रदेशको जागरण अभियान भने महिना दिन नपुग्दै थला परेको छ ।

कांग्रेस प्रदेश समितिका एक पदाधिकारीले कचनकवलमा कार्यक्रम आयोजना भएयता अभियानको अर्को कार्यक्रम हुन सकेको छैन । माघ २८ मा सुनसरीमा कार्यक्रम हुने तयारी रहेको ती पदाधिकारीले जानकारी दिए ।

पार्टी नेतृत्वको तल्लो तहसम्म प्रत्यक्ष संवाद स्थापित हुन नसकेको र यो अभियानले त्यसको कमी पूरा गर्ने बताउने नेताहरुको योजना मुताबिक किन अभियान अघि बढेन ? प्रदेश समितिका नेताहरु अभियान जारी रहेको बताउँछन् । 

‘लक्ष्य अनुसार अभियान जारी छ, कचनकवलबाट सुरु भएको अभियान सगरमाथासम्म पुग्नेछ’, प्रदेश सभापति थापाको भनाइ छ ‘हामी निरन्तर क्षेत्र–क्षेत्रमा अभियानमै छौं ।’ 

थापाले यस्तो दाबी गरे पनि कांग्रेसका कार्यकर्ताहरु भने अभियान घोषित लक्ष्य अनुसार सञ्चालन हुन नसकेको बताउँछन् । 

‘कार्यकर्ता र मतदातासँग अन्तरक्रिया गर्ने भनेर अभियान सुरु हुने दिन पनि नेताहरुले एकोहोरो भाषण मात्रै सुनाए, हाम्रा कुरा कसैले सुनेनन्’, झापाकै एक कार्यकर्ताले भने ‘त्यसयता गाउँघरमा कोही नेता पसेर हाम्रा कुरा सुनेको थाहा पाइएको छैन ।’ 

कार्यकर्ताका कुरा सुन्ने भने पनि अभियानलाई पुरानै मोडेलमा नेताका कुरा मात्रै एकोहोरो रुपमा सुनाउने तरिकाको बनाइएको उनको गुनासो छ । 

कार्यकर्ताहरु मात्रै नभइ नेताहरु स्वयम् पनि प्रदेशको अभियान घोषणा अनुसार अघि नबढेको भन्दै असन्तुष्ट छन् । संस्थापनइतर पक्षका नेता गुरुराज घिमिरेले पार्टीप्रतिको जनविश्वास खस्किने गरी घोषित कार्यक्रम सञ्चालन नभएको भन्दै चिन्ता प्रकट गरेका छन् । शेखर कोइराला पक्षका नेता घिमिरेले आफूहरुसँग यो अभियान र अरु कुनै पनि कार्यक्रमबारे छलफल र सल्लाह पनि नभएको बताए । 

‘पहिलो कुरा त कुनै पनि कार्यक्रम बनाउँदा हामीसँग सल्लाह गरिएकै छैन, केन्द्रदेखि प्रदेशसम्मकै अवस्था त्यही छ’, घिमिरेले भने ‘तर, पार्टीले कार्यक्रम  घोषणा गरेपछि सोही अनुसार कार्यक्रमहरु गर्नुपर्छ । घोषणा मात्रै गर्ने कार्यक्रम नगर्ने चलन पार्टीका सबै संयन्त्रमा फैलिएको छ । यसले पार्टीप्रतिको जनविश्वास र साख खस्काउँछ ।’

हालका प्रदेश सभापति थापासँग नेतृत्वका लागि प्रतिष्पर्धा गरेका नेता घिमिरे त्यसबेला झिनो मतान्तरले पराजित भएका थिए । 

कांग्रेसभित्र अध्ययनशील भनेर चिनिने नेता घिमिरे पार्टीले मतदाता र कार्यकर्ता भेटेर अन्तरक्रिया गर्नु, उनीहरुका कुरा सुन्नु सबैभन्दा राम्रो काम हुने बताए । 

‘तर, संवाद गर्ने भनेर कार्यक्रम घोषणा गरियो । अहिले त्यसलाई संकुचन गरेर पुस २४ पछि कहाँ के भयो भनेर कसैलाई थाहा नहुने अवस्था सिर्जना भएको छ’, उनले भने ‘यसो गर्दा पार्टीको प्रतिष्ठामा क्षति हुन्छ ।

यसो किन गरिन्छ, नेतृत्वले यसको जवाफ दिनुपर्छ ।’

भने अनुसारको कार्यक्रम पार्टीले नगर्दा कार्यकर्ता र  जनताको विश्वास कमजोर बनाएर लैजाने बताउँदै घिमिरेले थपे ‘यसको असर अन्ततः चुनावसम्मै पर्न जान्छ ।’

गएको कात्तिकमा विराटनगरमा भएको प्रदेश समिति बैठकले ‘कचनकवल–सगरमाथा जागरण अभियान’ सञ्चालन गर्ने निर्णय गरेको थियो । यो अभियान प्रदेश सभापति थापाको पुरानै योजना अनुसार तय भएको कार्यक्रम हो ।

दुई कार्यकाल झापा कांग्रेसको सभापति बनेका थापाले पहिलो पटक जिल्ला नेतृत्व सम्हाल्दै कचनकवलदेखि सगरमाथासम्म अभियान चलाउने योजना अघि सारेका थिए । 

त्यसपछि पनि उनी झापा सभापति भए । जिल्लाको नेतृत्वबाट बिदा भएपछि उनले प्रदेश पार्टीको नेतृत्व गर्ने अवसर पाए ।

समानुपातिक सांसद बनेर प्रदेशसभा प्रवेश गरेका उनी संसदीय दलको नेता हुँदै दुई पटक मुख्यमन्त्री बने, दुवैपटक उनलाई सर्वोच्च अदालतले पदमुक्त गरिदियो । 

यसरी जिल्ला सभापति हुँदैको योजना अनुसार प्रदेशको नेतृत्वमा रहदा कार्यान्वयनमा लैजान सफल भएका सभापति थापा नेतृत्वको अभियान भने घोषित लक्ष्य अनुसार अघि नबढेको उनकै निकट नेताहरु बताउँछन् । 

अभियान घोषणाको पहिलो महिना पूरा भएको छ । सातौं महिनामा सगरमाथा पुगेर अभियान समापन हुने भएकाले अझै समय भएको भन्दै अब अन्तरक्रिया र संवाद गरेरै अघि बढ्ने कांग्रेस प्रदेश समितिको दाबी छ ।