वडाध्यक्ष बस्नेतद्वारा खुट्टा भाँचिएकी दलित महिलाको उद्धार

विराटनगर । खुट्टा भाँचिएर थला परेकी एक दलित महिलाको सोलुखुम्बुको थुलुङ दूधकोशी गाउँपालिका–२ का वडाध्यक्ष युजन बस्नेतले आफैं चढ्ने मोटरसाइकलमा राखेर अस्पताल पुर्‍याएका छन् । 

बाढी पहिरोका कारण स्थानीय सडक क्षतिग्रस्त बनेपछि एम्बुलेन्स आउन नसक्दा वडाध्यक्ष बस्नेतले मोटरसाइकलमा राखेर विरामीको उद्धार गरेका हुन् ।

दुई दिनअघि सोही वडामा काम गर्ने क्रममा लडेर खुट्टा भाँचिएकी करीव ४२ वर्षीय कुमारी नेपालीलाई मोटरसाइकलमा राखेर गाउँपालिकामा रहेको प्राथमिक स्वास्थ्य केन्द्र पुर्‍याएको वडाध्यक्ष बस्नेतले जानकारी दिए ।

‘काम गर्ने क्रममा लडेर उहाँको खुट्टा भाँचिएको रहेछ, आर्थिक अवस्था कमजोर भएका कारण उपचार नगराई दुई तिनदेखि घरमै बसिरहनु भएको थाहा पाएर उद्दार गरिएको हो’ वडाध्यक्ष बस्नेतले भने, ‘एम्बुलेन्स बोलाउँदा बाटो बिग्रिएर आउन सकेन, स्टेचरमा लैजान पनि कठिन भएकोले मोटरसाइकलमै अस्पताल लगियो ।’

उनले बाढी पहिरोका कारण स्थानीय सडकहरू क्षतिग्रस्त बनेको जानकारी दिए । 

जसका कारण आपतकालिन सेवाका सवारी साधन संचालनमा समेत कठिनाई भएको बताए ।