मुख्यमन्त्री कार्कीद्वारा खेलकुद नियुक्ति छानविन गर्न मन्त्रालयलाई निर्देशन

विराटनगर । कोशी प्रदेशको खेलकुद विकास बोर्डले करार प्रशिक्षक नियुक्ति गरेपछि मुख्यमन्त्री तथा मन्त्री परिषद् कार्यालयले प्रक्रिया रोक्न निर्देशन दिएको छ ।

परिषदको कार्यालयले आइतबार सामाजिक विकास मन्त्रालयलाई पत्राचार गर्दै बोर्डले गरेको नियुत्ति प्रक्रियाको छानविन गरेर प्रतिवेदन बुझाउन निर्देशन गरेको छ ।

खुल्ला प्रतिस्पर्धा नगराई राजनीतिक फहुंचका ब्यक्तिलाई नियुत्त गर्ने तयारी भएको जनाउँदै यसअघि खेलकुद क्षेत्रका ब्यत्तिहरुले प्रदेश सरकारको ध्यानाकर्षण गराएका थिए ।

शाखा अधिकृत कोविद ढकालद्वारा हस्ताक्षरित पत्रमा सात दिनभित्र स्पष्ट रायसहितको छानविनको प्रतिवेदन तयार गर्न र सो अवधिभर नियुक्ति प्रक्रिया यथास्थितिमा राख्न निर्देशन दिइएको छ ।

अनियमित तथा धाँधलीपूर्ण तरिकाले अयोग्य र कनिष्ठ प्रशिक्षक छनोट गरेको  र योग्य र अग्रज प्रशिक्षकलाई बदनियत चिताइ लिष्टमा सम्मिलित नगराएको विषयको छानविन गर्न भनिएको छ ।

प्रदेश खेलकुद बोर्डलाई प्रशिक्षक नियुक्तिका लागि मन्त्री परिषद्को बैठकले नै २१ लाख रुपैयाँ दिने निर्णय गरेको थियो । बोर्डका सदस्य सचिव हंशराज वाग्लेले प्रदेशमा खेलकुदका एकै जना पनि प्रशिक्षक नरहेकाले ४२ जनालाई ६ महिनाका लागि नियुक्त गर्न प्रदेश सरकारसँग ९६ लाख रुपैयाँ माग गरिएकोमा २१ लाख मात्रै निर्णय भएको बताए । 

सो रकमले मासिक ३० हजार रुपैंयाँ दिनेगरी १५ खेलका १७ प्रशिक्षक नियुक्तिको प्रक्रिया पूरा गरेर आइतबार नै ११ जनाले पत्र बुझिसकेका छन् । नियुक्ति प्रक्रिया नियम संगत भएकाले आफूले गरेको निर्णयबाट पछि नहट्ने बताउँदै वाग्लेले सरकारमा रहेका ब्यक्तिहरुका मानिस छनोटमा नपरेकाले स्थगित गर्न लगाइएको आरोप लगाए । 

‘विज्ञसहितको समितिले छनोट गरेका प्रशिक्षकलाई नियुक्ति दिइएको हो, खेलकुद नबुझ्ने राजनीतिको फोहरी खेल गर्नेहरुले बिरोध गरेका हुन्’ वाग्लेले भने–‘के कारवाही र कुन छानविन त्यो मन्त्रालयले जान्दछ, म प्रक्रियामा अघि बढिसकेको छु ।’

उनले समावेशी तरिकाले ५ महिला प्रशिक्षक पनि छनोट गरिएको जानकारी दिए ।