महाकवि देवकोटाको ११८औँ जन्मजयन्ती र देवकोटा पुस्तकालयको ६८औँ वार्षिकोत्सव सम्पन्न

विराटनगर / देवकोटा पुस्तकालय विराटनगरको आयोजनामा महाकवि लक्ष्मीप्रसाद देवकोटाको ११८औँ जन्मजयन्ती तथा पुस्तकालयको ६८औँ वार्षिकोत्सव विविध सामाजिक र साहित्यिक कार्यक्रमहरूसहित सम्पन्न भएको छ।

“साहित्य, कला र संस्कृतिको उत्थान: समृद्ध राष्ट्रको पहिचान” भन्ने मूल नाराका साथ तिहार पर्वको अवसरमा कार्तिक २१ र २२ गते दुई दिने कार्यक्रम आयोजना गरिएको हो। पुस्तकालयका सभापति सुबोध निरोलाको सभापतित्व तथा ग्रीष्म ढुंगानाको मूल संयोजनमा कार्यक्रम सम्पन्न भएको थियो।

कार्तिक २१ गते काग तिहारका दिन देवकोटा चोकमा आयोजित खुला रक्तदान कार्यक्रमबाट दुई दिने समरोहको सुरुआत भएको थियो। प्रज्वन ढुंगानाको संयोजनमा सम्पन्न उक्त सामाजिक कार्यपछि, दोस्रो दिन कार्तिक २२ गते लक्ष्मी पूजाका दिन प्रात: ४ बजे महानगर क्षेत्रभित्र प्रभात फेरी निकालिएको थियो। समीप गौतमको संयोजनमा प्रभात फेरी सम्पन्न भएलगत्तै बिहान ७ बजे सुलभ ढुंगानाको संयोजनमा देवकोटा चोकबाट महाकविको तस्बिरसहितको भव्य रथ शोभायात्रा निकालिएको थियो।

शोभायात्रापश्चात् देवकोटा चोकस्थित महाकविको शालिकमा माल्यार्पण गरी उच्च सम्मान प्रकट गरिएको थियो। तत्पश्चात् आयोजित विचार गोष्ठीमा विभिन्न वक्ताहरूले महाकवि देवकोटाले नेपाली साहित्यको विकास र उत्थानमा पुर्‍याउनुभएको अतुलनीय योगदानबारे चर्चा तथा मन्तव्य व्यक्त गर्नुभएको थियो। उक्त माल्यार्पण तथा मन्तव्य कार्यक्रमको संयोजन शशांक अर्यालले गर्नुभएको थियो।