गाँजा र खैरो हेरोइनसहित तीन पक्राउ

विराटनगर । सुनसरी र मोरङ जिल्लाको छुट्टाछुट्टै स्थानबाट सोमवार गाँजा र लागुऔषध खैरो हेरोइनसहित ३ जनालाई प्रहरीले पक्राउ गरेको छ ।

सोमवार दिउँसो अस्थायी प्रहरी चौकी राजगञ्ज सिनवारीबाट खटिएको प्रहरीको टोलीले सुनसरीको देवानगञ्ज गाउँपालिका–६ नहरचोकमाबाट भारततर्फ जाँदै गरेको को १ ह ५०९९ नम्बरको अटोलाई रोकेर जाँच गर्दा गाँजा बरामद भएको हो । 

सो अटोको पछाडीको डिकी र अटोको भित्र छानोको भागमा प्लाष्टिकको एक–एक किलोको पोका बनाई राखेको ८० किलो गाँजा बरामद गरेको थियो ।

बरामद गाँजासहित अटोचालक सुनसरीको धरान–११ का २९ वर्षीय कुमार तामाङ र अटोमा सवार ३० वर्षीय रामबहादुर राई समेतलाई नियन्त्रणमा लिई आवश्यक अनुसन्धान कार्य गरिरहेको इलाका प्रहरी कार्यालय देवानगञ्जले जनाएको छ । 

यसैगरी लागुऔषध नियन्त्रण ब्युरो विराटनगरबाट खटिएको प्रहरीको टोलीले सोमबार भारतको अररिया जोगबनी–११ धर्मशालाका २० वर्षीय बिशाल पोदारलाई नियन्त्रणमा लिएको हो ।

उनलाई विराटनगर–१५ एक नम्बर ढाटस्थित भारतबाट नेपालतर्फ पैदल आउँदै गरेको अवस्थामा ३ ग्राम ११ मिलिग्राम लागुऔषध खैरो हेरोइनसहित नियन्त्रणमा लिई आवश्यक अनुसन्धान भइरहेको इलाका प्रहरी कार्यालय रानीले जनाएको छ ।