अझै सुल्झिएन खुम्बु क्षेत्रमा हेलिकप्टर उडान विवाद, सोलुमा सबै उडान ठप्प पार्ने चेतावनी

विराटनगर । खुम्बु क्षेत्रमा दुई सातादेखि अवरुद्ध हेलिकप्टर उडान तत्कालै खुल्ने सम्भावना झन्–झन् टर्दै गएको छ । हेलिकप्टर सञ्चालकहरूको संस्था वायु सेवा सञ्चालक संघले सोलुखुम्बु जिल्लाभित्र हुने सम्पूर्ण उडान बन्द गर्ने चेतावनी दिएसँगै अनिश्चय झनै बढेको हो ।

खुम्बु क्षेत्र कोशी प्रदेश मात्रै नभई मुलुककै मुख्य पर्यटन गन्तव्य क्षेत्र हो । सर्वोच्च शिखर सगरमाथासमेत पर्ने क्षेत्रमा जनवरी १ देखि नै हेलिकप्टर उडान ठप्प छ । यही क्रममा वायुसेवा सञ्चालक संघले सोलखुम्बु जिल्लाभित्र हवाई सेवा पूर्ण रूपले बन्द गर्नुपर्ने अवस्था आउन सक्ने चेतावनी दिएको हो । 

सगरमाथा राष्ट्रिय निकुन्ज, खुम्बु पासाङ ल्हामु गाउँपालिकासहितको संयुक्त बैठकले यसअघि सगरमाथा क्षेत्रको ४ हजार मिटरभन्दा माथि रेस्क्युबाहेकका उडान गर्न नपाइने लगायतका विभिन्न नियन्त्रणकारी प्रावधान लगाउन खोजेका थिए । लगत्तै हेलिकप्टर उडान रोकिएको थियो । त्यो क्रम अहिले पनि जारी छ ।

संघले बुधबार प्रेस विज्ञप्ति जारी गर्दै सुरक्षाको प्रत्याभूति नभए आगामी बुधबारदेखि सोलुखुम्बु जिल्लाभित्र उडान गर्ने ‘स्टोल’ वायुसेवा कम्पनीहरूले समेत हवाई सेवा पूर्ण रूपमा बन्द गर्ने बताएका हुन् । यसले सोलुखुम्बु जिल्लामा उडान सेवाको भविष्य अनिश्चित बनाएको हो ।

यसअघि सगरमाथा राष्ट्रिय निकुञ्ज, खुम्बु पासाङल्हामु गाउँपालिका, सगरमाथा राष्ट्रिय निकुञ्ज मध्यवर्ती क्षेत्र व्यवस्थापन समिति तथा खुम्बु क्षेत्रमा रहेका स्थानीय सरोकारवाला सरकारी–गैरसरकारी संघ–संस्थाहरूले विरोध गरेपछि हेलिकप्टर कम्पनीहरूले उडान बन्द गरेका थिए ।

हेलिकप्टर उडानमा लगाएको यस्तो प्रतिबन्धले वायुसेवा कम्पनीलाई ठूलो नोक्सानी परेको संघका अध्यक्ष मनोज कार्कीले बताए । उनका अनुसार यसले राष्ट्रिय तथा अन्तर्राष्ट्रिय क्षेत्रमा नकारात्मक असर पारेको छ ।

हिमाल आरोहण तथा पर्वतारोहणका लागि नेपाल आउने पर्यटकले गन्तव्य परिवर्तन गरी अन्य मुलुकतर्फ जाने हुँदा कोभिड महामारीपछि उठ्दै गरेको पर्यटन क्षेत्र धराशयी हुने देखिने बताउँदै उनले भने, ‘विदेशी मुद्रा आर्जनसँगै राजस्वमा समेत असर पुर्याएको छ ।’

सगरमाथा राष्ट्रिय निकुञ्ज र वायु सेवा सञ्चालकहरूप्रति आक्रोशित खुम्बु पासाङ ल्हामु गाउँपालिकाले आफ्नो अडान छाडेको छैन । अघिल्लो बिहीबार सार्वजनिक सूचना निकालेर गाउँपालिकाले वायु सेवा संघ र सगरमाथा राष्ट्रिय निकुञ्जप्रति रोष प्रकट गरेको थियो ।

गाउँपालिकाले संविधानतः जनताको सबैभन्दा नजिक रहेको स्थानीय सरकारसँग समस्त नागरिकहरूका अपेक्षा जोडिनु स्वभाविक रहेको बताउँदै खुम्बु क्षेत्रको प्रमुख पेशा व्यवसायको रूपमा रहेको पर्यटन व्यवसाय, विश्व सम्पदा सूचीमा सुचीकृत सगरमाथा राष्ट्रिय निकुञ्जको गरिमा र स्वच्छ वातावरणमा बाँच्न पाउने नागरिक अधिकारमाथि प्रतिकूल प्रभाव पार्ने गरी निश्चित पेशा व्यवसायीकर्मीहरूलाई मात्र लाभ पुर्याउने गरी गरिने क्रियाकलाप एक जिम्मेवार स्थानीय सरकारको लागि किमार्थ स्वीकार्य हुन सक्तैन भनेको थियो ।

अहिले सोलुका हेलिप्याडहरूमा स्थानीयले झन्डा गाडेर अवरोध सिर्जना गरिरहेका छन् । आकस्मिक अवतरण गर्न कुनै ठाउँ छैन । यस्तो अवस्थामा संघीय सरकारले पनि चासो नदिएको भन्दै वायु सेवा सञ्चालकहरूले आपत्ति प्रकट गरेका छन् ।  

नागरिक उड्डयन प्राधिकरणले यो विषय शान्ति सुरक्षासँग जोडिएकाले गृह मन्त्रालयलाई पत्राचार गरिसकेको सूचना अधिकारी ज्ञानेन्द्र भुलले जानकारी दिए । 

निकुञ्ज र गाउँपालिकाको निर्णय गैरकानुनी रहेको र यसरी अत्यावश्यक सेवामा बन्द गर्न मिल्दैन भन्दै प्राधिकरणले  गृहलाई पत्राचार गरिसकेको र उडान सुरक्षामा असर पर्ने भएकाले तत्कालका लागि उडान बन्द गरिएको भनेर पत्र आएपछि छलफल चलिरहेको भुलले बताए ।

हेलिकप्टर उडानमा चरम अव्यवस्था रहेको भन्दै गाउँपालिकाका अध्यक्ष मिङमा छिरी शेर्पाले भने ‘वायुसेवा सञ्चालक संघबाट एकाएक आपतकालीन उद्धार समेत नगर्ने गरी विज्ञप्ति जारी हुनुले स्थानीयवासी तथा अन्य सेवाग्राहीप्रति सेवाप्रदायकको असंवेदनशीलता प्रष्ट भएको छ । यो दुःखद् छ ।’