भोट खसाल्नै लाग्छ आधा घण्टा

विराटनगर । नेकपा एमाले मोरङको नयाँ नेतृत्व चयनका लागि मतदान जारी छ । रेजा लगाउनुपर्ने संख्या धेरै भएपछि मतदान कार्य निकै सुस्त छ । मतदान कार्य सुस्त भएपछि निर्वाचन कमिटीले मतदान गर्ने स्थान २२ बाट बढाएर २७ स्थान पुर्याएको छ ।

मतदान स्थल थपेपछि भने मतदान गर्ने संख्या बुधबार दिउँसोबाट केही बढेको छ । दिउँसो डेढ बजेसम्म करिब तीन सय जनाले मतदान गरिसकेको केन्द्रीय निर्वाचन कमिटीका सदस्य समीर नेपालले जानकारी दिए  । विभिन्न क्लस्टर र भूगोल क्षेत्र मिलाएर मतदान गर्नुपर्दा मतदान प्रक्रिया केही ढिलो भएको उनले बताए । उनका अनुसार एक जनाले घटीमा १३ मिनेट र बढीमा २५ मिनेटसम्म मतपत्रमा रेजा लगाउन समय लगाइरहेका छन् ।

रेजा लगाउनै समय लाग्ने भएकाले मतदान प्रक्रिया राति अबेरसम्म जानसक्ने उनले बताए । मतदानका लागि तोकिएको ४ बजेपछि भने मतदान स्थल होटल मनास्लु इनका मुल गेट बन्द गरेर भित्र रहेकालाई मात्र मतदान गर्न दिइने उनले बताए ।

एमाले मोरङको अध्यक्षसहितका पाँच पदाधिकारीमा १० जनाको उम्मेदवारी परेको छ । सदस्यतर्फ हल खुलातर्फको १० सिटमा  २४ जनाको उम्मेद्वारी परेको छ । त्यस्तै समावेशी क्षेत्रतर्फ २४ सिटका लागि ३९ जनाको उम्मेदवारी परेको छ भने भूगोलतर्फत ५६ सिटका लागि १११ जना उम्मेदवार छन् । यसरी कुल ९५ सिटका लागि १८४ जना उम्मेदवार बनेका छन् ।