चुहारको झोलुङ्गे पुल क्षतिग्रस्त, बाङ्सिलाघाट बन्यो बगर

विराटनगर । उदयपुर र भोजपुर जोड्ने चुहारको झोलुङ्गे पुल कोशी नदीको बाढीले क्षतिग्रस्त बनाएको छ । 

तीब्र बहावका कारण झोलुङ्गे पुलको एकातर्फको लठ्ठा चुँडिएर पुलमा क्षति पुगेको हो । त्यसैगरी पुलमा बिच्छ्याइएका स्टिलका पाता समेत बगाएको जनाइएको छ ।

बाढीले हसनपुरस्थित निर्माणाधीन चुहार पक्की पुलमा समेत क्षति पुर्‍याएको छ ।

सुनकोशीको बाढीले उदयपुरको चौदण्डी नगरपालिका–१ स्थित बाङ्सिलाघाट बगरमा परिणत भएको छ । त्यहाँका सातवटा घरमा क्षति पुगेको जनाइएको छ । स्थानीयका पशुचौपायाका खोर गोठ समेत बगाएको जनाइएको छ ।

चौदण्डी–१ का वडाध्यक्ष सिताराम राईले ठुलो क्षति भएको जानकारी आएको बताए । लगातारको वर्षाका कारण प्रभावित क्षेत्रमा जान नसकिएको र अहिले पानी पर्न छोडेका कारण आफूसमेत प्रभावित क्षेत्रमा जाने तयारी गरिरहेको बताए ।

‘अधिकांश घरहरूमा क्षति गरेको जानकारी आएको छ’ उनले, ‘म अब त्यतातिर जाने तयारी गर्दैछु, क्षतिको विस्तृत जानकारी भरेतिर आउनसक्छ ।’

अहिले उक्त स्थानमा पानी घट्दै गएको जनाइएको छ ।