६ सय ७८ किलो गाँजासहित दुई पक्राउ

विराटनगर । मोरङ प्रहरीले प्रतिबन्धित लागुऔषध गाँजाको ठूलो परिमाणसहित दुई जनालाई नियन्त्रणमा लिएको छ । 

रतुवामाई नगरपालिका–१ हटियाडाँडास्थित आमबारीबाट सोनापुरतर्फ जाँदै गरेको ट्रकबाट छ सय ७८ केजी गाँजा बरामद गरिएको हो ।

आइतबार दिउँसो ४ बजेतिर इलाका प्रहरी कार्यालय सिजुवाबाट खटिएको प्रहरी टोलीले शंका लागी प्र १–०१–००१ ख ३८२५ नम्बरको ट्रक रोकेर जाँच गरेको थियो । 

सो जाँचका क्रममा ट्रकको डालाभित्र ‘फल्स डाला’ (नक्कली खण्ड) जोडी लुकाई छिपाई राखेको अवस्थामा उक्त परिमाणको गाँजा फेला परेको थियो ।

प्रहरीले गाँजासहित ट्रकका चालक धनकुटाको सहिदभूमि गाउँपालिका–२ का समेल राई र सोही ट्रकका धनी सहिदभूमि–१ का विक्रम विसुङ्खेलाई नियन्त्रणमा लिएको छ ।

उनीहरू दुवैलाई इलाका प्रहरी कार्यालय, सिजुवा ल्याई थप अनुसन्धान कार्य भइरहेको प्रहरीले जनाएको छ । 

ठूलो परिमाणमा गाँजा बरामद हुनुले सो क्षेत्र लागुऔषधको तस्करीको पारागमन विन्दु बनेको आशङ्का गरिएको छ ।