विराटनगरका युवाहरूले सजाए काली मन्दिर

विराटनगर । विराटनगर बजारभित्रको प्रसिद्ध धार्मिक स्थल काली मन्दिर यहाँकै केही युवाहरूको पहलमा सजाइएको छ ।

दशैंको अवसरमा मन्दिर व्यवस्थापन समितिसँग सहकार्य गरेर निशुल्क रुपमा मन्दिर क्षेत्रको साजसज्जा गरेका हुन् ।

विराटनगरका राहुल सोनी लगायतको समुहले काली मन्दिर अगाडि मेन रोडको उत्तर र दक्षिण सडकमा सजावट गरेको हो । सजावट गरेपछि काली मन्दिर क्षेत्र झकिझकाउ बनेको छ । 

काली मन्दिरमा बडा दशैंको अवसरमा भारतबाट समेत भक्तजनहरू आउने गरेका छन् ।

शुक्रबार भने सजावट गरिएका सामग्री विज्ञापन कम्पनी आकृति एडभर्टाइजिङ र साइन हबले हटाइदिएपछि विवाद भएको थियो । 

दुवै पक्षबीच वडा प्रहरी कार्यालयमा भएको छलफलपछि क्षति पुर्याएको सामग्री विज्ञापन कम्पनीले पुनः मर्मत गरेर राखिदिएपछि विवाद मिलेको थियो ।