सीएनआईका महिला उद्यमीको महिला एक्स्पो

विराटनगर । नेपाल उद्योग परिसंघ (सीएनआई) कोशी प्रदेश समितिसम्वद्ध महिला उद्यमीहरुले विशेषगरी महिलाहरु नै सम्वद्ध भएर उत्पादन गर्दै आएका वस्तुहरुको प्रवर्द्धनका लागि महिला एक्स्पो आयोजना गर्ने भएका छन् । 

महिला उद्यम समितिले चैत्र २३ र २४ गते विराटनगरमा महिला एक्स्पो–२०८० को आयोजना गर्ने घोषणा गरेको हो । 

बिहीबार विराटनगरमा पत्रकार सम्मेलन गर्दै समितिले अतिथि सदनमा महिला एक्स्पोको आयोजना गर्न लागेको जनाएको छ । महिला उद्यम समितिकी संयोजक रचना राठीले महिला एक्स्पोमा कोशी प्रदेशभरिका ६० भन्दा बढि औद्योगिक उत्पादनको स्टल रहने जानकारी दिइन् ।

१४ वटै जिल्लाका महिलाहरूले उत्पादन गरिरहेको औद्योगिक उत्पादनको संरक्षण र प्रवर्द्धनका लागि महिला एक्स्पोको आयोजना गर्न लागेको उनले बताइन् । 

घरेलु एवं औद्योगिक वस्तुहरू प्रदर्शन गर्ने, वस्तु तथा सेवाको प्रवर्द्धन गर्ने, महिला रोजगारी र महिला उद्यमशीलताका क्षेत्रबारे उद्यमीहरुलाई जाग्रित गराउने लगायतका उदेश्य राखेर एक्स्पो आयोजना गरिएको उनले बताइन् ।

महिला उद्यमीहरूबाट उत्पादित वस्तु तथा सेवाको बजार व्यवस्थापन गर्न र उपभोक्ताका माझमा नयाँ स्वदेशी प्रविधि र वस्तुको पहिचान गराउन समेत महिला एक्स्पो कोसेढुंगा सावित हुने संयोजक राठीले बताइन् । दुई दिनसम्म हुने एक्स्पोमा २५ लाख रुपैयाँ बढीको कारोबार हुने जनाइएको छ ।