बिहारको दरभंगामा फुट्यो कोशी (फोटो)

विराटनगर । तीब्र बहावका साथ बगिरहेको कोशी नदी भारतको दरभंगामा फुटेको छ । दरभंगा जिल्लाको किरातपुर ब्लकको भुभौग गाउँ नजिकै कोशीको पश्चिमी बाँध भत्किएपछि त्यस क्षेत्रका गाउँ जलमग्न बनेको छ ।

कोशी नदी फुट्दा नेपालमा हुने क्षतिको तुलनामा भारतमा धेरै हुने गरेको छ । प्रभावित क्षेत्रमा मंगलबार बिहारका मुख्यमन्त्री नितिश कुमारको निर्देशनमा उच्च अधिकारीहरूद्वारा हवाई निरीक्षण गरिएको छ ।

बाँध टुटेका कारण दरभंगा जिल्लाका गाउँहरू बाढीको चपेटामा परेको विहार सरकारको जल संसाधन विभागले जनाएको छ । विभागले सरकारी अधिकारीहरूले बाढी र तटबन्धको अवस्थाबारे समीक्षा समेत गरेको उल्लेख गरेको छ । 

गाउँहरूलाई डुबानबाट बचाउनका लागि युद्धस्तरमा काम गर्न सम्बन्धित निकायहरूलाई निर्देशन दिइएको जनाइएको छ । प्रभावित क्षेत्रमा तत्कालै सुरक्षा सहयोग पुर्‍याउन सरकारी अधिकारीहरूलाई निर्देशन गरिएको विभागले जनाएको छ ।

भत्किएको बाँध क्षेत्रमा मंगलबार नै करिव दुई लाख थान तटबन्ध प्रतिरोधक झोलाहरू र पाँच लाख ७ हजार नाइलन क्रेटहरू तयारी अवस्थामा राखिएको जनाइएको छ । त्यहाँ बाढी नियन्त्रणबाहिर पुगेका कारण अहिले प्रभावित क्षेत्र कोशीको बाढीले जलमग्न बनेका छन् । प्रभावितहरुकाे संख्या हुन नसकेको पनि जनाइएको छ । कोशी मंगलबार विहान करीव १ बजेतिर फुटेको भारतीय संचारमाध्यमहरुले जनाएका छन् ।