महेन्द्र मोरङ क्याम्पसमा बीबीएको प्रवेश परिक्षाको नतिजा विवादमा

विराटनगर । विराटनगरस्थित महेन्द्र मोरङ कलेजमा बीबीए संकायमा अध्ययनका निम्ति लिइएको प्रवेश परीक्षाको नतिजा रातारात परिर्वतन गरेपछि विवाद भएको छ । 

नतिजाको मेरिट लिस्ट निकालिएको १२ घण्टाभित्रै परिर्वतन गरिएपछि अभिभावक तथा विद्यार्थीले विरोध जनाएका छन् । 

गत भदौ २१ गते लिइएको प्रवेश परीक्षाको मेरिट लिस्ट कात्तिक १६ गते आइतबार अपरान्ह प्रकाशित गरिएको थियो । कलेजले अपरान्ह प्रकाशित गरेको नतिजा भोलिपल्टै सोमबार बिहान परिर्वतन गरेपछि आधा दर्जन विद्यार्थी पीडित भएका छन् । 

१६ गतेको नतिजामा भर्नाका निम्ति मेरिट लिस्टमा परेका विद्यार्थीहरूलाई १७ गतेको नतिजामा वेटिङ लिस्टमा पारिएको र यसअघिको सूचिमा नरहेका विद्यार्थीलाई मेरिट लिस्टमा समावेश गरेर नतिजा प्रकाशित गरेपछि विवाद भएको हो । 

पहिलो नतिजाको ९६ औं नम्बरमा रहेका विद्यार्थी यदिति कर्ण र ९९ औं क्रमसंख्यामा रहेका संकल्प शाही लगायतका थप विद्यार्थीहरूलाई प्रतिक्षा सूचिमा राखिएपछि ती विद्यार्थीका अभिभावकले विरोध जनाएका छन् । 

उनीहरूले चलखेल गरेर रातारात उत्तीर्ण विद्यार्थीलाई वेटिङ लिस्टमा राखिएको भन्दै बीबीए संकायका विभागीय प्रमुखसामु विरोध जनाएका छन् । 

विराटनगर–५ का अभिभावक सुनिल शाहीले चलखेल गरेर रातारात मेरिट लिस्ट परिर्वतन गरिएको दाबी गरे । 

उनले कलेजको जवाफ चित्तबुझ्दो नभएकाले कानुनी उपचारको बाटो रोज्ने चेतावनी दिए । 

अर्का अभिभावक नवीन कर्णले नतिजा प्रकाशित गरिसकेपछि परिर्वतन गर्नुपर्ने अवस्थामा सम्बद्ध विद्यार्थीका अभिभावकलाई सहभागी गराउनुपर्नेमा अपारदर्शी र शंकास्पद ढंगले नतिजा फेरबदल गरिएको बताए । 

हचुवाको भरमा नतिजा परिर्वतन गर्दा पीडित विद्यार्थीहरूको मानसिकतामा नकारात्मक असर परेकोले त्यसको जवाफदेहिता कलेजले लिनुपर्ने उनको भनाइ छ ।

पहिलो नतिजा प्रकाशन गरेसँगै कलेजले बिहान १० बजेबाट भर्नाका लागि आउन विद्यार्थीलाई सूचना समेत जारी गरेको थियो । तर कलेज पुग्दा नतिजा परिर्वतन भएको थाहा पाएपछि अभिभावक मर्माहत भएका थिए । 

उता बीबीए संकायका प्रमुख मोहन श्रेष्ठले भने कलेजको नतिजा प्रकाशन सम्बन्धी कार्यविधि अनुसार नै नतिजा परिर्वतन भएको दाबी गरे । 

नतिजा प्रकाशन गरेपछि हकदाबीको प्राबधान अनुसार केही विद्यार्थीहरू हकदाबी गर्न आएपछि उनीहरूको हकदाबी जायज देखिएकाले नतिजा परिमार्जन गरिएको उनले बताए ।

अभिभावकहरुले भने दाबीबिरोधको व्यवस्थालाई टेकेर नतिजा परिर्वतन गर्ने अनुचित खेल भएकाले यस विषयमा सम्बन्धित निकायले छानबिन गर्नुपर्ने माग गरेका छन् । 

उनीहरूले पहिलोपटक प्रकाशित नतिजालाई कार्यान्वयन नगरे कानुनी प्रक्रियामा जाने चेतावनी समेत दिएका छन् । 

कलेजले बीबीए संकायमा बर्सेनि ९९ जना विद्यार्थी भर्ना लिने गरेको छ । कलेजले ९९ विद्यार्थीलाई ३३÷३३ जना गरी तीनवटा सेक्सनमा राखेर अध्यापन गराउँदै आएको छ ।