मिल्स र बेलबारी विजयी हुँदै सेमिफानलमा

विराटनगर । मोरङ जिल्ला स्तरिय वि डिभिजन क्रिकेट प्रतियोगिता अन्तरगत विराटनगरको वैजनाथ क्रिकेट रंगशालामा भएको खेलमा मिल्स क्रिकेट क्लव र वेलबारी क्रिकेट क्लव विजयी भएका छन् । दुवै क्लव  सेमिफानलमा पनि प्रवेश गरेका छन् ।

पहिलो खेलमा मिल्स क्रिकेट क्लवले इलाइट क्रिकेट क्लवलाई २५ रनले पराजित गरेको थियो । टस जितेर ब्याटिङ गरेको मिल्सले निर्धारित २३ ओभरको खेलमा २२ दशमलव ४ बलमा सवै विकेट गुमाई १०५ रन बनाएको थियो । 

म्यान अफ द म्याच घोषित मिल्सका विशाल ढकालले ३० रन बनाउँदा विशाल रिसिदेवले १७ रन जोडेका थिए । इलाइटका सोनी सिंहले ३ विकेट लिँदा अमर यादव र सलन कामतले मिल्सको समान २–२ विकेट लिए ।

१०६ रनको विजयी लक्ष्य पछ्याएको इलाइटले २१ ओभरमा सवै विकेट गुमाई ८० रनमा सिमित बन्यो । 

इलाइटका सागर मल्लिकले २६ रन बनाउँदा रुद्र साहले १३ रनको योगदान दिए । मिल्सका आयुस श्रेष्ठठले ३ विकेट लिए । कृष्ण मण्डल र रितीक चौधरीले २–२ विकेट विकेट लिए ।

प्रतियोगिताको दोस्रो खेलमा वेलबारी क्रिकेट क्लवले पथरी शनिश्चरे क्रिकेट क्लवलाई ५ विकेटले पराजित गरेको छ । टस जितेर ब्याटिङ गरेको पथरीले निर्धारित २५ ओभरको खेलमा १९ दशमलव ४ बलमा सवै विकेट गुमाई ९३ रनको योगफल बनायो । पथरीका आवेश कार्कीले १७ रन बनाए । त्यस्तै सागर कटुवालले १६ रन जोडेका थिए । वेलबारीका विदुर महताराले सर्वाधिक ३ विकेट लिन सफल भए ।

८८ रनको लक्ष्य पछ्याएको वेलबारीले १८ दशमलव ४ बलमा ५ विकेटको क्षतिमा लक्ष्य भेट्यो । वेलबारीका लागि दिपेश सुवेदी ४२ रन बनाउँदा सचिन कलुवालले २२ रनको योगदान दिए । सुवेदी म्यान अफ द म्याच घोषित भए । पथरीका केविल राई र नेल्सन डंगोलले २–२ विकेट लिएका थिए ।