इरान–अमेरिका वार्तामा प्रगति, तनाव भने कायमै

तेहरान । इरानका शीर्ष सुरक्षा अधिकारीले शनिबार अमेरिकासँग भइरहेको वार्ता सकारात्मक दिशामा अघि बढिरहेको बताएका छन् । यद्यपि, इरानी सेना प्रमुख आमिर हटामीले अमेरिकालाई कुनै पनि प्रकारको सैन्य आक्रमण नगर्न कडा चेतावनी दिनुभएको छ ।

अमेरिकी राष्ट्रपति डोनाल्ड ट्रम्पले पनि दुई देशबीच संवाद जारी रहेको पुष्टि गरेका छन् । तर उनले अमेरिकी नौसैनिक जहाजहरू इरानको तट नजिक तैनाथ गरिएको उल्लेख गर्दै सैन्य तनाव पूर्ण रूपमा हटिनसकेको संकेत गरे ।

इरानी राष्ट्रपति मसूद पेझेष्कियनले इरानले कहिल्यै युद्धको खोजी नगरेको स्पष्ट पार्दै युद्ध दुवै देश र सम्पूर्ण क्षेत्रका लागि हानिकारक हुने बताए ।

इजिप्टका राष्ट्रपतिसँगको टेलिफोन वार्तामा उनले जनहितलाई केन्द्रमा राख्दै शान्तिपूर्ण समाधानतर्फ अघि बढ्न सरकारलाई आग्रह गरे ।

यसैबीच, कतारका प्रधानमन्त्री तथा विदेशमन्त्री शेख मोहम्मद बिन अब्दुलरहमान अल थानीले शनिबार तेहरानमा इरानी अधिकारीहरूसँग भेटवार्ता गर्दै क्षेत्रीय तनाव न्यूनिकरणका लागि कूटनीतिक पहल गरेका छन् । 

इरानी सेना प्रमुख हटामीले चेतावनी दिँदै भने, “यदि शत्रुपक्षले कुनै भूल गर्‍यो भने त्यसले आफ्नै सुरक्षा, क्षेत्रीय स्थिरता तथा इजरायलको सुरक्षामाथि गम्भीर खतरा निम्त्याउनेछ।”

उनले इरानी सेना पूर्ण सतर्कता र उच्च तयारी अवस्थामा रहेको पनि बताए ।

यसैबीच, इरानमा बढ्दो जीवनयापन खर्चविरुद्ध जनवरीमा भएका प्रदर्शनहरू हिंसात्मक बनेका थिए ।

सरकारी तथ्यांकअनुसार ती घटनामा तीन हजार ११७ जनाको मृत्यु भएको छ । मानवअधिकार संस्थाहरूले मृत्यु संख्या ६ हजार ५६३ पुगेको दाबी गरेका छन् ।

राष्ट्रपति पेझेष्कियनले सरकारलाई जनताको असन्तुष्टि गम्भीरतापूर्वक सुनी जनमुखी शासन सञ्चालन गर्न निर्देशन दिएका छन् ।

यसरी, इरान र अमेरिकाबीच संवाद प्रक्रिया जारी रहे पनि दुवै देशले सम्भावित सुरक्षा चुनौतीलाई ध्यानमा राख्दै उच्च सतर्कता कायम राखेका छन् । (रासस/एएफपी)