वनभोजमा गएको म्याजिक भ्यान दुर्घटना

सुन्दरहरैंचा । मोरङको सुन्दरहरैचा–१२ बाट बुधबार बनभोजका लागि इलाम  गएको को १ ज ३७०६ नम्बरको म्याजिक भ्यान दुर्घटना भएको छ ।

इलामको माई नगरपालिका–२ गोरखेमा भ्यान सडकबाट १५ मिटर तल खसेको जिल्ला प्रहरी कार्यालय इलामले जनाएको छ ।

हुस्सु लागेर बाटो अलमलिएका कारण गाडी चालकले गाडी रोकेर स्थानीयलाई चेप्टी जाने बाटो सोध्न बाहिर निस्किएको समयमा गाडी गुडेर सडक भन्दा १५ मिटर तल खसेको थियो ।

गाडी दुर्घटनामा सुन्दरहरैंचा–१२ खोर्साने बस्ने ५६ वर्षीया विष्णुकुमारी खड्का, ५० वर्षीया कोपिला कार्की र ५७ वर्षीया माया तामाङ सामान्य घाइते भएको प्रहरीले जनाएको छ ।

तिहारमा देउसी भैलो खेलेर जम्मा गरेको रकमबाट रमाइलो गर्न हेप्पी ड्रिम्स चेप्टी गएका १४ जना ज्येष्ठ महिलाहरू दुर्घटनामा परेको प्रहरीले जानकारी दिएको छ ।