ढाकामा लडाकु विमान स्कुलमा ठोक्किँदा १९ जनाको मृत्यु

ढाका । बाङ्ग्लादेशको राजधानी ढाकामा सोमवार अपराह्न एक हृदयविदारक घटना भएको छ ।

बाङ्ग्लादेश वायुसेनाको एउटा तालिम विमान दुर्घटनाग्रस्त भई उत्तरास्थित माइलस्टोन स्कूल तथा कलेजको भवनमा ठोक्किँदा कम्तीमा १९ जनाको मृत्यु भएको छ । यस दुर्घटनामा सयभन्दा बढी मानिस घाइते भएका छन्, जसमध्ये धेरैजसो विद्यालयका विद्यार्थी रहेको बताइएको छ ।

बाङ्ग्लादेशको अन्तरिम सरकारका प्रमुखका सहयोगी प्राध्यापक सयेदुर रहमानले मृतकको सङ्ख्या पुष्टि गरेका छन् । घाइतेमध्ये ७३ जनालाई शरीरका विभिन्न भाग जलेका कारण अस्पतालमा भर्ना गरिएको छ ।

वायुसेनाले आफ्नो तालिम विमान दुर्घटनामा परेको पुष्टि गरेको छ । दुर्घटनाको कारणबारे भने विस्तृत जानकारी आउन बाँकी छ। यस घटनाले ढाकामा ठूलो सङ्ख्यामा जनधनको क्षति पुर्‍याएको छ र थप विवरणहरू आउने क्रममा छन् ।