विराटनगरको तीनपैनीमा टिपरको ठक्करबाट एकजनाको मृत्यु

विराटनगर । विराटनगर–२ स्थित तिनपैनीमा सोमबार साँझ टिपरको ठक्करबाट स्कुटर चालकको मृत्यु भएको छ । 

पश्चिमबाट पूर्वतर्फ जाँदै गरेको प्रदेश १–०२–००१ क ४५१४ नम्बरको टिपरले सोही दिशातर्फ गइरहेको को २७ प ८५३४ नम्बरको स्कुटरलाई पछाडिबाट ठक्कर दिंदा घटनास्थलमै मृत्यु भएको जनाइएको छ । 

दुर्घटनापछि आक्रोसित भिडले टिपरमा आगजनी गरेका छन् ।

मृत्यु हुनेमा स्कुटरका चालक मोरङको कटहरी–१ जमकोटीका ७६ वर्षीय सुदीशनारायण झा रहेको जिल्ला ट्राफिक प्रहरी कार्यालय विराटनगरले जनाएको छ ।

प्रहरीले टिपर चालक मोरङको ग्रामथान गाउँपालिका–७ का ३१ वर्षीय सजन चौधरीलाई नियन्त्रणमा लिएको जनाइएको छ ।