महाशाखा प्रमुख सरोज गौतमलाई पितृशोक

विराटनगर । विराटनगर महानगरपालिकाका राजस्व व्यवस्थापन महाशाखा प्रमुख सरोज गौतमलाई पितृशोक परेको छ ।

गौतमका पिता टंकप्रसाद गौतमको ८० वर्षको उमेरमा आइतबार साँझ विराटनगर–१२ स्थित आफ्नै निवासमा निधन भएको छ ।

स्वर्गीय गौतम पछिल्लो समय फोक्सोको क्यान्सरबाट पीडित थिए । राष्ट्रिय जनमोर्चा पार्टीसँग आवद्ध गौतमले पार्टीका तर्फबाट २०७९ सालको स्थानीय तहको निर्वाचनमा विराटनगर महानगरपालिकाको मेयर पदमा उम्मेदवारी पनि दिएका थिए ।

संखुवासभाको चैनपुरमा जन्मिएका गौतमको परिवार मोरङको गोविन्दपुर हुँदै विराटनगर बसोबास गर्दै आएको हो ।

परिवारमा गौतमका सरोजसहित दुई छोरा, एक छोरी र श्रीमती छन् ।

स्वर्गीय गौतमको अन्तिम संस्कार सोमबार होटखालास्थित परम विश्रान्ति घाटमा गरिएको छ ।

अन्तिम संस्कारमा विराटनगर महानगरपालिकाका मेयर नागेश कोइरालालगायत सामाजिक तथा राजनीतिक क्षेत्रका विभिन्न व्यक्तिहरूको उपस्थिति थियो ।