होटल एसोसिएसन भेडेटारको अध्यक्षमा लिम्बू

धनकुटा : होटल एसोसिएसन भेडेटारको अध्यक्षमा तुमराज लिम्बू निर्वाचित भएका छन् । एसोसिएसनको पाँचौ साधारणसभाले कार्कीछापस्थित होटल माउन्ट एभरेष्टका सञ्चालक लिम्बूको अध्यक्षतामा १५ सदस्यीय नयाँ कार्यसमिति सर्वसम्मत निर्वाचित गरेको हो ।

एसोसिएसनको उपाध्यक्षमा सीता गुरुङ, सचिबमा लालबहादुर श्रेष्ठ, सह–सचिवमा यामन सुब्बा र कोषाध्यक्षमा गोविन्द थापा चयन भएका छन् । त्यस्तै, सदस्यहरूमा नेमिता आङवुहाङ, प्रमिला सुब्बा, कविता लावती, तारा राई, पर्शुराम थापा, रमेश बोहोरा, विलियम श्रेष्ठ, दिपेन सुब्बा, नवराज थापा र सुनिता खड्का चयन भएको एसोसिएसनले जनाएको छ ।

कार्यक्रममा एसोसिएसनका पूर्वअध्यक्ष एवं साँगुरीगढी गाउँपालिकाका अध्यक्ष जितेन्द्र रुम्दाली, साँगुरीगढी–६ का वडाध्यक्ष यमप्रकाश मगर लगायतले नयाँ कार्यसमितिलाई बधाईसहित सफल कार्यकालको शुभकामना दिए । भेडेटार बजारसहित आसपास क्षेत्रमा करिब २ सय होटल सञ्चालनमा छन् ।

एसोसिएसनमा भने ७० जना जति होटल व्यवासायी मात्र आवद्ध छन् ।