बुद्ध एयरको जहाजमा गिद्ध ठोक्कियो, ६८ यात्रुसहित बोकेको जहाज सकुशल अवतरण

पोखरा । काठमाडौँबाट पोखराका लागि आएको बुद्ध एयरको एटिआर-७२ फ्लाइट नम्बर ६१७ को जहाजमा चरा ठोक्किएको छ ।

पोखरा विमानस्थलमा अवतरणका क्रममा शनिबार दिउँसो ३.४५ बजे जहाजमा चरा ठोक्किएको बुद्ध एयर पोखरा स्टेशनका प्रबन्धक गौतम बरालले जानकारी दिए ।

चरा ठोक्किदा जहाजको ‘प्रोपलरको ब्लेड’ अर्थात पंखा अलिकति कुच्चिएको छ । सकुशल अवतरण भएको जहाजका ६८ यात्रु र चालक दल सुरक्षित रहेको जनाइएको छ ।

ठोक्किएको चरा गिद्द भएको जनाइएको छ ।

नेपालका विमानस्थलमध्ये पोखरा विमानस्थल चराको अत्यधिक गतिविधि हुने सूचीमा रहेको छ ।